MADC-ah eptute chhuaktau

Mara Autonomous District Council (MADC) Thlasik thutkhawm ni khat awh chu nimin khan MADC Session Hall, Siaha-ah neih a ni.

He Session hi MADC Chairman, H. Sahlo-a’n kaihruaiin zawhna leh chhanna hun hman a ni a. Hetihlai hian eptu lam MNF MDC te chuan Council sawrkar chu an pawm loh thu leh tuna ziaka an neih BJP Legislature Party Leader chu K. Chiama a nih thu sawiin, MADC sawrkar chu eng sawrkar nge, tunge House Leader tiin an au bengchheng a. Hetiang sawrkar chiang lo leh Leader pawh chiang lo sawrkar hi zawhna zawh tlakah pawh an ngaih loh thu leh Session-ah pawh telpui tlak nia an ngaih loh thu sawiin, House an chhuahsan a ni.

Eptu lam Member-te an chhuah hnu hian zawhna pathum chhan a ni a, chawhma lam session hman zawhah chawhnu lamah hun hman zui niin Zyhno VC thiahna Paper chu House-ah pharh a ni bawk.