Lei 6 dawh hna thawk mek

Kaladan Multi Modal Transit Transport Project hnuaia Lawngtlai atanga chhimthlang lam hawia Myanmar ram pawh tur kawngpui sial mek ah Lei (Bridge) pariat (8) dawh tur a ruahman zinga lei paruk dawh hna thawh mek a ni.

KM 87-a thui he kawngpui a Lei paruk dawh mek zingah Lunghauka Bridge chu hna zaa 95 zawh tawh a ni a, Khawrawp Bridge, Hmawngbu Bridge leh Bawklawk Bridge te chu zaa 90 zawh tawh a ni a, Ngengpui Bridge chu zaa 54 zawh tawh niin, Zochate Bridge chu zaa 45 zawh tawh a ni.

Lei dang pahnih dawh tura ruahman, tuna hna la tan loh, Zocha Bridge chu Bridge Design, IIT, Guwahati in ala pawm fel loh avangin hna hi thawh mai theih ala ni lova, Lei dang, Ruankhum Bridge chu a dawhna tur hmun sawn hret a ngaih avangin Lei innghahna tur leilung enfiah mek a ni bawk. Multi Modal kawngpui tia hriat lar hi kum 2010 atanga laih tan a ni a, ruahman lawk ang chuan kumthar 2020 March thla a zawhfel tur a ni a, tun dinhmun ah hnathawh tur pumpui atanga chhutin zaa 84 chuang thawh zawh tawh a ni.