MJA hruaitu ten Serchhip District an rawn tlawh

MJA General Hqrs. hruaitute chuan zankhat riak turin nimin khan Serchhip District an rawn tlawh a, Horticulture Department hmalakna an tlawh nghal.

MJA General Hqrs. hruaitute hi an President, Zonunsanga Khiangte hovin Treasurer C. Lalhmachhuana leh Secretary 2- Lal Rinmawia leh Joseph Lalnuntluanga te niin nimin chhun khan Serchhip thlengin MJA Serchhip District member ten an lo dawngsawng a, hemi hnu hian Horticulture Department hmalakna te thlirin Center of Excellence, Lengte chu an tlawh nghal a ni.

Lengte a Center of Excellence tlawhtu MJA member te hi Serchhip DHO, M. Vanlal-zami leh a thawhpui ten lo dawngsawngin an hmalakna te an sawi a. Horticulture Department in Mizoram-ah Center of Excellence Pali (4) a neih thu leh an hmalakna hrang hrangte en-a Central Institute of Horticulture in Ranking an pek ah 2 Star hmu awmchhun an nih thu a sawi a, thlai tiak hrang hrangte helai hmun atanga an pekchhuah thin thu sawiin, Dragon Fruit sing ruk vel leh Serthlum 25,000 vel pekchhuah tur nei tura an inbuatsaih mek thu a sawi a. Rampawn atanga Mizoram-a thlai tiak lo lut chu a chhe veklo tih sawiin, amaherawh chu a variety leh a dinhmun hriatchian a nih loh thin avangin mi tam tak ten an tihsual phah thin thu a sawi bawk.

Hei bakah hian Serchhip DHO chuan Serchhip chu Thlasik thlai, a bikin Zikhlum thar nasa a nih thu sawiin, a thar vanglai chuan Bazar-ah pawh a dahnaa indaihloh avangin NABARD kaltlangin Collection Centre chu Mat lui bul Chawm kai-ah sak tura ruahman mek a nih thu a sawi bawk.

Serchhip District tlawhtu MJA General Hqrs. hruaitute leh MJA Serchhip District member te hian tukin hian Serchhip District Bawrhsap, Sangchhin Chinzah kawmin tukthuan a buatsaih sak nghal anga, hemi hnu hian Fisheries Department hmalakna te an tlawh leh bawk ang.