Cooperative Week kharna nei

All India Cooperative Week vawi 66-na kharna chu nimin khan Aizawl Vanapa Hall-ah neih a ni a, Chief Secretary, Lalnunmawia Chuaungo chuan khuallian niin a hmanpui.
Mizoram State Cooperative Union leh Cooperation Department tangkawp buatsaih All India Cooperative Week kharna hunah hian Chief Secretary, Lalnun-mawia Chuaungo chuan Mizoram-ah Cooperative Society vanga hmasawnna thleng mek chu lawmawm a tih thu sawiin, Mizoram Cooperative Apex Bank pawh Mizoram chhunga Bank hna thawk tha ber pawl dinhmun luahtu a nih mek thu a sawi a. Cooperative Society chu hmasawn tumna kawnga duh zawng leh tuina inang mi hrang hrang kalkhawmna a nih avangin pawl tha leh chak tak a nih thu a sawi a, hmun kilkhawr zawk thleng phak hmasawnna hna thawktu pawimawh tak an nih thu a sawi bawk.
Chief Secretary chuan Cooperative Society chu induhsak bik awmlohna leh rualkhai taka in dawm tawnna pawl a nih thu sawiin, hlawh-tlin tuma bei tak tak te zirchian a, a tul huna puitu ni thin turin hruaitute chu a chah a. Mahni tana tha tur leh hlawkna turah chuan Sawrkar inrawlh ngailo a mahni phak tawk a hmalak tum ve a tul thu sawiin, chutiang ang rilru pu a neitu nihna thinglung nen thahnem ngai tak a hmasawnna hna thawk thin turin kalkhawm te a fuih bawk.
All India Cooperative Week kharna hun hi K. Lalchamreia, President, MSCU chuan kaihruaiin khual zahawm, JP. Agrawal, IAS, Secretary, Cooperation Department chuan Cooperative Society-ah Mizo thalai lehkhathiam tam zawk lut tura a duh thu a sawi a, Mizoram chu khawtlang inpawh tak leh inthliarna awm lo a nih avangin Cooperation anga hnathawhna hmun nuam tak a nih thu a sawi bawk. Mizoram-ah hian State Level Cooperative Society 11 leh Primary Level Cooperative Society 1173 a awm mek a ni.

Comments

Chhiar Hlawhte