MNF hruaitu thar ten Hnam Run-ah thu an sawi

MNF Party chuan nimin khan Aizawl-a Mizo Hnam Run-ah Chhung Inkhawm neiin an Party General Hqrs. hruaitu atana thlan thar ten thu an sawi.
Nimin a MNF Chhung Inkhawm-ah hian MNF President atana thlan thar leh Chief Minister, Zoramthanga chuan MNF Elected OB-te term chu kum 3 ni mah se kum 5 chu an kal dan a ni tlangpui tih a sawi a, “Vanapa Hall-ah kan Constitution kha kan amend a, Elected OB-te thlang tur hian Nomination Committee kan siam a, Elected OB ni lai te, GS leh Adviser atangin 7 ve ve, NCC leh PAC atangin mi 33-te kan awm a. Boral tawh leh zinbote an awm avangin mi 29-ten Ballot Paper in Kohhran Ipa thlanin kan thlang a. Ruat ni lovin a thlanin kan inthlang a ni,” a ti a. Kumthar lama hruaitu insiamtharna an neih hma loh chuan Frontal hrang hrang nen nihna pangngaiin an kal rih tur thu a sawi bawk.
    Chief Minister chuan an sorkar chu a nghet tawk tih pawh sawiin, “MLA 27 kan nei a, bul kan tan tha a, mi tam tak rin aiin kan che tha nghal a ni. Kan chetthatna min daltu chu Fur chhung a rei a, MP inthlan leh inthlan neuh neuh a tam a, hnathawhna hun kan nei tam lo a ni,” a ti a. Opposition ten thildang a beihna hre lovin thu tlinglo leh fahrahte te in an bei mai mai tih pawh sawiin, “Social Media thlengin kan tiha mawi lovin min sawitir a, mi pahnih phei chuan ngaihdam min dil tawh nghe nghe a ni. MNF chu a tir phat atangin hming kan la thlak ve lo a, MNF kan la ni reng a. ZPM hming thlak sek hian Zoram hi khawiah mah min hruai ngai lo ang,” a ti bawk.
    He hunah hian MNF Senior Vice President atana thlan thar, Tawnluia, Deputy Chief Minister pawhin hetiang ang dinhmun sang leh nihna zahawm taka hlangkaitu MNF mipui leh Pathian chungah lawmthu sawiin, “Hnam Run kalte hi vei hle thin mah ila Cancer natna in hun rei tak min tlakbuak a. Mahse, Zoram mipui tawngtaina avangin Lalpa’n min tidam a ni,” a ti a. Mipui tel lovin ke an pen thei lo tih sawiin, “MNF chu Mizo hnam hmahruaitu kan ni. Kan hnathawhna kawng hrang hrangah Zoram mipui tawiawmna leh tawngtaipuina ka ngen a. Thurawn leh rawtna nei apiangin rawn thlen zel ang che u. MNF Martar-te thisenin a bual a nih avangin nawhreh theih a ni ngai lovang,” a ti bawk.
    MNF Vice President thar, Vanlalzawma pawhin MLA atanga a tlak hnu kum 2010 khan MNF Treasurer-ah dahin nikum inthlanpui a a tlak hnuah dinhmun sang Treasurer-ah dah leh a nih thu sawiin, an hotute kaiza vengin party tan hna a thawk dawn tih a sawi a. Vice President thar bawk, Lalthlengliana pawhin MNF-ah Elected OB nih ala ngaihtuah ngailoh thu sawiin, an Party hotu ten an dahna erawh lawm taka a pawm thu a sawi bawk.

Comments

Chhiar Hlawhte