Latest News

65th National School Games Boxing U-17 neih tan a ni

Ni 4 chhung awh tur 65th National School Games Boxing Under-17 chu nimin khan R. Deng-thuama Multipurpose Hall, Mualpui, Aizawl-ah neih tan a ni a, School Education Minister, Lal-chhandama Ralte chuan he intihsiakna hi a hawng a ni.
65th National School Games Boxing Under-17 hawnna hunah hian School Education Minister, Lalchhandama Ralte chuan National School Games Boxing-a tel zawng zawngte chu chakna, theihna leh thiamna an neih hmanga hnehna chang tura theihtawp chhuah turin duhsakna a hlan a. Mizoram-a an cham chhungin remna leh muanna hnuaiah hlim taka awm turin duhsakna a hlan a ni.
Education Minister chuan National School Games neih chhan chu zirlaite taksa leh rilru tihhmasawn a pawimawhzia a taka lantir a nih thu sawiin, he intihsiakna hian zirna In ten zirlaite thanlenna atana infiamna kan dah pawimawhzia a tarlang a ni, a ti a. Infiammite chu anmahni-a a tha ber chhuaha, infiammite tih a mawi a che tur leh dik taka infiamna kalpui turin duhsakna a hlan nghal bawk.
November 19-22, 2019 chhunga neih tur 65th National School Games 2019, Boxing Under-17 (boys) hawnna inkhawm hi Esther Lal Ruatkimi, Commissioner & Secretary, School Education Department in kaihruaiin India ram hmun hrang hrang atanga infiammi leh Official lo kal te lawmna thu sawi a, Human Resources Development Board Vice-Chairman, L. Thangmawia MLA pawhin he hun hi hmanpuiin inelna a tel zawng zawng hnenah ngaihhruina thilpek hlan an ni bawk.
65th National School Games, 2019 Boxing Under-17 (Boys) ah hian India ram State hrang hrang leh Unit 36 atangin Boxer 413 leh Officials 73, an vaiin mi 486 an tel a. Weight Category 13 ah inelna neih a ni ang.

Comments

Popular News (Last 30 Days)