Governor intawhkhawmna ah Mizoram Larsap in Tribal chawikanna tura rawtna a thlen

India rama Governor leh Lt. Governor te intawkhawmna, Conference of Governors vawi 50-na chu Inrinni khan New Delhi-a Rashtrapati Bhavan-ah President Ram Nath Kovind chuan a hawng a. He hunah hian Mizoram Larsap, PS. Sreedharan Pillai chuan Tribal te harsatna tawh hrang hrang te sawiin, Tribal te dinhmun chawikanna atan rawtna a thlen.

Conference of Governors hawnna neih a nih hnu hian Session hrang hrang neih chhunzawm nghal niin heng Session zinga pakhat, ‘Parallel Session for Breakaway Group 'A' - Tribal Issues’ ah Mizoram Governor, P.S. Sreedharan Pillai chuan State Governor, Lt Governor, Union Minister leh India rama Official pawimawh kalkhawmte hmaah Mizoram dinhmun sawiin, Mizoram chu State pakhat chhunga mipui cheng awm zat teha Tribal awm tam na ber a ni tih sawiin, “Mizoram mipui 94.4% chu Scheduled Tribe(ST) an ni,” a ti. Central Sawrkar leh Mizoram sawrkar hmalakna in Tribal te hamthatna tur hrang hrang kalpui mek a nih rualin hmalakna tur tam tak a awm thu sawiin, “Dan tlang puiin Tribal te chenna chu hmun kilkhawr zawk leh tlangram, inkalpawhna bakah inbiakpawhna te pawh a thatlohna hmun te a ni tlangpui a. Hei vang hian tribal te hian damloh thu hlaah harsatna lian tak an tawk mek a. Tribal te harsatna tawh mek te sutkian a nih theihnan Central sawrkarin ruahmanna thar a siam belh a ngai a ni,” a ti.
Mizoram chhunga sumchang thei thil tam tham ber chu Mau (Bamboo) a ni tih sawiin Larsap chuan, “Mau hmanga eizawnna siam kawngah Mizoram Sawrkar chuan chak takin hma a la mek a. Hemi kawngah hian Central Sawrkar puihna lian tham zawk mamawh a ni,” a ti.
Larsap chuan Mizoram in a mamawh dang pawimawh em em chu Health Care System tih changtlun a ni tih pawh sawiin, “Damdawi In changtlung zawk, tunlai thiamna hmanga siam damlo enkawlna khawl changkang zawk te state mipuiin an mamawh em em laiin a la tlem hle a. Damlo enkawlna khawl changkang tam zawk Mizoram-ah mamawh a nih bakah inkalpawhna kawngpui tam zawk siam a la ngai a. Tun dinhmunah chuan thih leh dam kara hmanhmawh taka Damdawi In pan a tul changin harsatna lian tak damlo ten an tawk mek a ni,” a ti bawk.
Conference of Governors hi nimin khan a kharna neih leh niin he hunah hian Mizoram Larsap hian Mizoram Sawrkar dinhmun, hmalakna leh hmachhawp te bakah Mizoram pawimawhna leh ngaihven a tul nachhan te a sawi a. Larsap chuan Mizoram chu International ramri thui tak Myanmar leh Bangladesh a tawmpui avangin India tan Asia khawmualpui lam hawia kawtchhuah pawimawh tak a ni thei a. Lawng hmanga India hmarchhak leh India mainland inkalpawhna kawtchhuah a ni thei bawk a. Chuvangin Mizo-ram awmna hmun India in a chhawr tangkai dawn chuan Act East Policy of India hi vung zawka kalpui a ngai dawn a ni, a ti.
Good Governance huangah Mizoram chuan chhuanawm takin hma a la mek tih Larsap chuan sawiin, NITI Aayog zirchianna ah Mizo-ram chu State te (small) zingah Health Outcomes Index a sang ber a nih thu leh India hmarchha kah SAUBHAGYA (Pradhan Mantri Sahaj Bijli Har Ghar Yojana) hlawhtling taka kalpui thei hmasa ber a ni tih a sawi bawk.
Mizoram chhunga Mau te chu sum tam tak siam theihna tur hmanrua a nih thu pawh he hunah hian Larsap chuan sawiin, “Mau hman tangkai kawngah hian Central Sawrkar pawhin sum leh thiamna hmanga State a rawn puih a tul hle a ni,” tiin sawrkar hmalakna tura pawimawh hrang hrangte a sawi a. Kawng leh Digital Connectivity hrim hrimah Mizoram dinhmun a la hniam hle tih pawh sawiin, “Connectivity thil ah hian Central sawrkar pawhin Mizoram chu a ngaihven zual bik ngai zinga mi kan ni,” a ti a. “State la naupang tak a nih avangin Central sawrkar atanga tanpuina hi a mamawh lo thei lo a ni,” a ti bawk.

Comments

Chhiar Hlawhte