Central Motor Vehicles Amendment Act vangin lirthei neitu leh khalhtute fimkhur zual turin chah

Serchhip District Transport Officer, B. Lalrinsanga chuan Central Motor Vehicles Amendment Act, 2019 in lirthei chi hrang hrang dan bawhchhiahte hremna thar a tihchhuah chu ramchhung hmundanga hman a nih rualin Mizoram-ah pawh hman ve tur a nih thu sawiin, lirthei khalhtu ten an zawm tur Dan te chu zawm kim turin mipuite a ngen bawk.

Tunhnaia mipuite hnena thuchah a tihchhuah ah Serchhip DTO chuan Central Motor Vehicles Amendment Act, 2019 hi hman a nih chuan lirthei dan bawhchhiate hremna chu a let nga velin a sang dawrh dawn nia tarlangin, chuvang chuan kan lirthei document te a fel fai em tih enfiaha, document fello lirthei engmah khalh chhuaklo tur leh lirthei khalhtuten an zawm tur dan te zawm kim ngei turin mipuite a ngen a. Dan thar ah chuan; Section 177 (General Offence)-ah a hlui ah Rs. 100/- a nih laiin a thar ah chuan Rs. 500/- a ni dawn a. Thupek zawmlo te hremna Rs. 500 ni thin kha Rs. 2000/- a ni tawh anga. License nei lo lirthei khalh te, Driving Licence nei lova lirthei khalhte chu dan tharah chuan Rs. 5000/- chawi tir tawh tur an ni dawn a, dan phal baka lirthei lo tihlen emaw tih danglam emaw pawh Rs. 5000/- chawi theihna niin hremna pek laia lirthei khalhte phei chu Rs. 10,000/- chawi tir tawh tur an ni.

Rui chunga lirthei khalhte chu Rs. 10,000/- chawitir tur an ni tawh dawn a, hlauhawm taka lirthei khalh pawh Rs. 5000/- thleng chawi tir tur an ni ang. Kawngpuia intlansiak chingte dan hluiah Rs. 500 chawitir thin kha dan tharah chuan Rs. 5000/- a ni tawh dawn a, Permit thi tawh khalh chhuak chu Rs. 10,000/- thleng chawi tir tur niin; bungraw phurh theih chin bithliah pel te chu Rs. 20,000/- leh chawi belh (ton khat zelah Rs. 2000/-) chawi tir tur an ni tawh ang. Passenger phurte pawh Seat Capacity aia tam phur chu mi pakhat zelah Rs. 1000/- chawi tir tur an ni a, Seat Belt hreng lova lirthei khalh chu Rs. 1000/- chawitir tawh tur an ni. Two Wheelera mi pahnih aia tam an inphurhin Rs. 1000/- chawitir bakah an licence thla thum (3) tih thih sak tur a ni a, Helmet khum lova khalhte pawh hetiang bawk hian hrem theih an ni ang. Ambulance, Fire Brigate lirthei kawng kian duhlo chu Rs. 10,000/- chawi tir theih niin Insurance neilo lirthei chu Rs. 2000/- chawi tir theih an ni ang. Kum tling lova lirthei khalh te chu an nu leh pa emaw, an Gurdian te Rs. 25,000/- thleng chawi tir bakah kum thum (3) Jail tan tir theih an ni ang tih a tarlang bawk.