Serchhip District in SSG Award-2019 a dawng

Nimin khan New Delhi-a World Toilet Day hmanna ah kumina India rama thingtlang khawfai intihsiakna lawmman, Swachh Survekshan Grameen (SSG) 2019 Award sem a ni a, Mizoram atanga lawman dawng zingah Serchhip District pawh telin, he Award hi PHE Serchhip WATSAN Division-a Sr. EE, Er. F. Lalsanglura chuan New Delhi-ah a dawng a ni.
SSG 2019-ah hian India Hmarchhak State leh UT bakah State tenau (small state) zingah Mizoram chuan lawmman pakhatna a dawng a, SSG 2019-ah hian District ranking pawh siamnghal niin, Kolasib District chu pakhatna-ah awmin, Serchhip chu pahnihna a ni a, Aizawl District chu pathumna-ah a awm bawk a ni. SSG 2019 Award dawng tur hian Mizoram atangin Er. HC. Lalnunzira, Director, WSSO hovin Serchhip bakah SSG 2019 Award dawng ve District dang pahnih Kolasib leh Aizawl District atangin EE, PHE te an kal a ni. PHE Department hotute chuan hetianga rampum huap lawmman Serchhip District-in a dawng thei chu lawmawm an tih thu an sawi a, department thawktute leh mipuite tanrualna vanga hetiang lawman hi dawng thei an ni tih sawiin, lawmthu an sawi bawk.

Comments

Chhiar Hlawhte