Presbyterian Kohhran Zirlaibu tichhuak ta

Mizoram Presbyterian Kohhran chuan nakum 2020-a ‘Nilai leh Beihrual Thupui’ leh ‘Puitling Sunday School zirlaibu’ tur chu a tichhuak ta a. Heng lehkhabu pahnihte hi Mizo lehkhabu malkhai ah chuan copy chhutchhuah tam berte an ni.

Nakum 2020 hian Mizoram Presbyterian Kohhran chuan Puitling Sunday School-ah “Estheri leh Thuhriltu Hrilhfiahna” tih an zir dawn a. He zirlaibu hi Presbyterian Pastor-te zinga mithiam, Rev. K. Lalpiangthara, tuna Chhinga Veng Bialtu ni lai mek ziah a ni a, he zilaibuah hian zirlai 47 awmin phek 236 a chhah a ni bawk. Mizoram puma Synod Bookroom dawr zawng zawngah lei theih tura chhawp chhuah mek a ni a, a chhut man Synod-in 25% a subsidised avangin Rs. 100 chauh-a lei theih a ni anga, copy 90,000 chhut a ni. He Zirlaibu hi Mizoram Synod hnuaia Kohhran zawng zawngte zirlaibu a nih bakah Presbyterian Church of Myanmar (PCM) nen an inremna angin Mizoram Synod chuan kumtin Copy 1000 zet a thlawnin Presbyterian Church of Myanmar hi a pe thin bawk a ni.
    Kum 2020 Nilai leh Beihrual Thupui zirlai thupui tur hi “Kohhran leh Zirtirna Dik Lo” tih a ni dawn a. Mizoram Synod Moderator pawh lo ni tawh leh Presbyterian Pastor-te zinga mithiam, Rev. Vanlalchhunga ziah a ni a, copy 70,000 chhut a ni a, a copy chhut tam ber tum a la ni.