MAL in Mizo Academy Award 2019 an hlan

Mizo Academy of Letters (MAL) chuan nimin khan Central YMA Hall, Tuikhuahtlang ah Annual Meeting neiin Lalthangfala Sailo hnenah Mizo Academy Award 2019 hlan a ni.
Nimin-a MAL Annual Meeting hi MAL President, Prof. Laltluangliana Khiangte chuan kaihruaiin, Prof. Rualkhuma Colney chuan kum 2019 chhunga MAL chetvelna te tarlangin, MAL in kum thum dana an pek thin, Mizo Academy Award 2019 chu Lalthangfala Sailo hnenah a hlan a ni. He chawimawina hian Medal, thu chei leh tangkafai Rs. 20000 a keng tel bawk.
Nimin a MAL Annual Meeting hi Education Minister, Lalchhandama Ralte chuan Khuallian nia hmanpuiin he huna Award dawngtu, Lalthangfala Sailo a lawmpui thu leh hun rei tak MAL lo kaihruai a, thu leh hla lamah pawh Zofate thu tha tak tak min hnutchhiahtu a nih thu a sawi a. MAL chu pawl tangkai leh hlu tak Zofate thu leh hla lama nasa taka min dawm kangtu a ni tih sawiin, kan thu leh hlate chhawm-nung a pawchhuak zel thei tur thangthar te an tel chhoh a pawimawh thu a sawi bawk.
Nimin-a Mizo Academy Award 2019 dawngtu Lalthangfala Sailo hi July 16, 1933 khan a piang a. Thiamna lamah MA niin UCC, Barapni; St. Edmund College Shillong leh Cham-phai College-ah te thawkin Dy. Registrar NEHU a thawk tawh a, hla 50 chuang, lemchan 10 chuang a ziak tawh a. Chawimawina hrang hrang Sangeet Natak Akademi Award 2007, Padma Shri 2009, Bharat Adivasi Drama Award 2012 leh Pu Buanga Award 2015 te a lo dawng tawh a ni. Lalthangfala Sailo hi he chawimawina dawng thei mi 13-na a ni.
MAL hian chawhnu lamah Mizo |awng leh Eight Scheduled chungchang sawihona hun hmangin hruaitu thar an thlang nghal bawk.

Comments

Chhiar Hlawhte