Serchhip District-ah Beat System kalpui a ni dawn

Nimin chhun dar 12:00 khan Serchhip District chhunga Beat Officer tura Police in an ruat te tan an hnathawh tur chungchang inzirtirna, Beat System Training neih a ni.

Serchhip SP Conference Hall-a he Beat System Training neih hi Serchhip Addl. SP, PC. Laltanpuia chuan kai-hruaiin he hun hmanpuitu Serchhip SP, R. Sathiyasundaram IPS chuan India ram hmundang, mihring tamna hmunah te chuan mipuite himna leh Dan leh thupek kenkawhna kawngah nasa zawka hmalak a nih theihna turin kawtthler enkawl bik leh chan bik te neia enkawltu tur Police te inruat thin a nih thu sawiin, hemi ang hian Serchhip District chhung khaw hrang hrangte mipui ten Police an mamawh huna awlsam zawk leh rang zawka Police ten hna an thawha an biak-pawh theih turin Beat System hi hman a nih dawn thu leh Beat Officer te hi ruat an nih thu a sawi a. Beat Officer tura ruat te chu an hnathawh tur te uluk taka thawk tur leh mipuite himna tura thawk an ni tih in hre reng turin a chah bawk.

Beat System Training-ah hian Resource Person atan PC. Laltanpuia, MPS, Addl. SP Serchhip chu hman niin Serchhip Police ten dan leh thupek kenkawhna leh hnuchhui kawnga awlsam zawk leh chak zawka hma an lak theih nan kalphung thar leh tha zawk nia ngaih Beat System hman tawh tur a nih thu a sawi a, he sysytem hi khawvel ram tam takah hman mek anih thu a sawi bawk.

He huna tarlan a nih danin Serchhip District chhunga khua leh veng hrang hrangte chu Police Beat-14 ah then niin, chung Beat Area tinah chuan Police Beat Officer pahnih zel an awm dawn a, Beat Officer te chuan an huamchhung Veng tin leh khawtina vantlang hmunhma- School, damdawi In, Biak In leh a dangte, mihring cheng zat te leh thil tul apiang an hriain an zir reng anga, chak takin dan leh thupek kenkawhna lam an thawk dawn a ni, a ti bawk.