IT hmanrua lei nan chang nuai 20 chuang seng tawh

Mizoram sawrkarin a hnuaia thawk Under Secretary chunglam mi 39 tan Rs. 20,55,795/- sengin IT hmanrua a leisak tawh tih Chief Minister-in House a hrilh.

Nimin-a Assembly Session-ah zawhna chhangin Chief Minister, Zoramthanga chuan sawrkar laipuiin Digital India leh e-governance a kalpui chhoh mekah state sawrkar te a nawr nasa a, ‘Sawrkar hna lak thar tura thiamna ngai zingah Group D leh engemaw ngaihhnathiam tlem te tih lohah chuan Computer thiamna lamah Diploma tal neih a ngai,’ tih a nih tawh hial avangin state sawrkar pawh a tang nasa, a ti a. Sawrkarin Laptop, Tablet leh thil dang lei phalna a pekte hi Officer zawng zawng ni lovin a mamawh zualpui te chauh leh IT lama thiamna nei, a hmang thiam leh hlawkpui tur te an ni, a ti a. Sawrkarin IT hmanrua a leisak hi Officer mimal ta ni lovin sawrkar ta a nih thu leh a chhiat leh a bo thu-ah a kawltute’n mawh an phur tih sawiin Chief Minister chuan, “Kum 5 a liam hma chuan a dang lei leh theih pawh a ni lova, a kawltu Officer te hmundanga sawn an nih chuan an aiawha rawn awm te’n an chhawm zel tur a ni,” a ti bawk.

Chief Minister sawi danin, Sawrkar hnathawk sangte Laptop leh thil dang leisakte chu hlawm 3-ah then a ni a. Hlawm khatna ah Chief Secretary, Principal Secretary, Commissioner leh Secretary dah niin, Rs. 80,000/- man thleng an lei thei a. Hlawm 2-na ah Addl. Secretary, Joint Secretary leh Head of Department dahin Rs. 60,000/- man thleng an lei thei a. Hlawm 3-na ah chuan Deputy Secretary, Joint Secretary, Under Secretary leh Civil SDO dah niin, Rs. 40,000/- man thleng an lei thei a. Heng mite hi an vaia leisak vek tur tihna ni lovin a mamawhte chauh leisak an ni a. Tun thlengin mi 39 leisak an ni tawh a, hemi atana sawrkar-in sum a sen chu avaiin Rs. 20,55,795 a ni.