Aizawl-ah National Integration Camp neih tan a ni

Sawrkar Laipui a Ministry of Culture hnuaia East Zonal Cultural Centre leh Ministry of Youth Affairs & Sports hnuaia Nehru Yuva Kendra Sangathan (NYKS), Mizoram tangkawp buatsaih, National Integration Camp chu nimin khan Youth Hostel, Luangmual, Aizawl-ah neih tan a ni.

Ni 5 awh tur National Integration Camp hi Sports Minister, Robert Romawia Royte chuan hawngin NYKS buatsaih National Integration Camp-ah amah ngei pawh kum 1986 khan a lo tel ve tawh thu leh a hlawkpui thu sawiin, State hrang hrang atanga lokalte pawhin an hlawkpui ngei a beisei thu a sawi a. Mizoram-a an cham chhungin a tam thei ang bera Mizoram nawmna leh mawina, danglam bikna te zirchhuak a, an thian dangte pawh hrilh ve tura sawmin, India hmarchhak leh India ram chhung ril zawk ten inpawmtawn leh inhriatpawh tawn kan mamawh tih a sawi a, India ram mawina leh ropuina hnam hrang hrang leh tawng hrang hrang hmangte nunphung leh zia rang hrang hrang inzirtawn leh in ngaihhlut sak tawn thei a kan awm hi kan vannei hle a ni a ti bawk.

National Integration Camp-ah hian India ram state 12 – Assam, West Bengal, Bihar, Chhattisgarh, Jharkhand, Kerala, Manipur, Nagaland, Odisha, Sikkim, Tripura leh Mizoram atangin thalai mi 300 vel an tel a, November ni 29, 2019 thleng Camp hian a awh dawn a ni. Camp neih chhungin Cultural Programme hrang hrang neih a ni dawn a, Constitution Day lawmna leh Constitution Rally te neih a ni ang. Hei bakah hian Assam Rifles hmun tlawhin ralthuam chi hrang hrang entirna an chhim ang a, mi hlawhtling hrang hrang kawmna hun an neih dawn bakah Infiamna leh intihsiakna chi hrang hrang an nei bawk ang.