Tripura Camp-a Bru laklet hna thawh mekah Chhungkaw 221-a mi 892 hruaikir an ni tawh

Tripura Bru Relief Camp-a Mizoram khua leh tui awmte Mizoram a hruaikir thawh 9 na kal mekah nimin thleng khan chhungkaw 221-a mi 892 te chu Mizoram-ah hruaikir an ni tawh a. Tun thla ni 30 thleng thawh tur Bru lakletna kalpui mekah hian rawn kir tur an la awm leh awmloh erawh hriat a ni lo thung.

Home Department hotute sawi danin Bru hruaikir hna thawh mekah hian Zirtawpni leh Inrinni khan mahni duhthu a lokir an awm tawh lova, chhungkaw 4,447 hruaikir tura ruahman zingah chhungkaw 221 chauh an lo la kir a, heng zinga tam tak hi Official-te hruaikir ni lovin anmahni a a ruk-a-ral deuhva lokir an ni. Tun thlenga lokirte hi mi 541 chu puitling an ni a, 351 chu naupang an ni a. Chhungkaw 134 hi Mamit District-ah inbenbeltir an ni a, Lunglei District-ah chhungkaw 68 leh Kolasib District-ah chhungkaw 19 te inbenbeltir an ni a. Bru hruaikir hna hi October ni 3 atanga tanin dodalna leh kawng dante a awm chungin kalpui zel a ni a, tun thla ni 30 hian zawh fel tura ruahman a ni.
November ni 8-a Mizoram sawrkara thutlukna siam kawnga thuneitu sang ber, Council of Ministers thukhawm chuan Bru hruaikir hna hi ruahman lawk angin November ni 30 thleng kalpui nise, a hnu lamah chuan hruaikir hna hi thawh tawh loh ni se tiin thutlukna a siam a. Sawrkar laipui Ministry of Home Affairs hotute pawhin tun tum, Bru hruaikir vawi 9-na hi a tawp ber a nih tawh dawn thu an puang a. September ni 6-a Delhi a Joint Monitoring Group (JMG) thutkhawmna, Bru aiawh pawlte telnaah pawh he thu hi Special Secretary (Internal Security), Ministry of Home Affairs, Dr. AP. Maheshwari khan a lo puang chiang tawh a ni.
Hetihlai hian Mizoram Bru Displaced People’s Forum (MBDPF) chu tunhnai khan ‘tihluihna hmanga hruaikir tum’ ni a insawiin Supreme Court-ah an zualko leh bawk a. Supreme Court Ukil, Ali Zia Kabir Choudhary ruaiin sawrkar chu kaw ruak chunga Mizoram a huaikir hna thawkah puhin, hei hi mihring chanvo palzutna a ni, an ti a. Hemi chungchang an sawina ah Bru hruaitute chuan hruaikir luih an duhloh thu leh a duh chu Mizoram-ah kir mai sela, a duhlo chu Tripura-ah awm mai se tih chu an duh dan a nih thu an sawi a ni.

Comments

Chhiar Hlawhte