Lalduhoma’n ZPM Block Conference a hmanpui

Zoram Peoples’ Movement (ZPM) Tuikum Block chuan nimin khan Khumtung Community Hall-ah Block Conference vawi 1-na hmangin Lalduhoma, MLA bakah ZPM hruaitu dang ten an hmanpui.

ZPM Tuikum Block Conference-ah hian Lalduhoma chuan tunhnaiah ZPM MLA te chuan MLA hlawh an la lo tih sawiin, hei hi an Val Upa Council te thu ang a nih thu leh hetianga ZPM in Party uaptu an nei chu an vannei em em tih a sawi a. Tunhnaiah Minister pakhat chuan GPC Meeting-a amah chu MLA hlawh tihsan duh a, tihpun duh angin a lo sawi chiam nia sawiin, “Hei hi Dawt mu hlum a ni,” a ti a. “GPC Meeting thu hi tih leak-out chi a ni lo hrim hrim a, hetianga Minister nilai meuhin dawt hmanga min bei chiam mai hi an khawngaihthlakawm hle a ni,” a ti bawk
    Hei bakah hian Lalduhoma chuan tunlai Zoram politics thlirin boruak thar a thleng thut thut tih pawh sawiin, “Nimin lawkah MNF Party chuan an hruaitu an thlang a, thawm kan lo hriat dan chuan an Party chhungkaw boruak a chhiat phah hial a ngem? tih turin thawm a awm a, Sawrkarna fawng chelhtu anni na in an khawngaihthlakawm hle a ni,” a ti a. “Zoram-ah hian thingtlang mipui, kuthnathawktute thleng phak Sawrkar tha hi kan neih thuai a ngai a, chumi tur chuan theihtawp i chhuah ang u,” a ti bawk.