Chanchin thar thenkhat :

ZEDA hotu ten Governor an kawm :

Zoram Energy Development Agency (ZEDA) hotute chuan nimin khan Mizoram Governor Hari Babu Kambhampati chu Raj Bhavan-ah kawmin Raj Bhavan tana Nizung chakna hmanga Electric current pekchhuahna, 70 kWp SPV Power Plant bun thar chungchang te leh Mizoram hmun hrang hrangah mipui ten Nizung chakna hmanga eng leh current siamchhuah tangkai zia an hriat chian zawk dan turte an sawiho a. ZEDA hotute hmalakna chu tha a tih thu Governor chuan sawiin, Mizoram mipui tam zawkin Nizung chakna hman tangkai erawh an la tum chiah lo nia a lan avangin ZEDA leh P&E Department ten mipui zirtirna thiam taka uar zawka an kalpui erawh a ngai a ni, a ti.

Governor chuan Solar Power siamna atan Offgrid aiin Grid-Connected System a pawimawh zawk nia a hriat thu a sawi a, Grid-Connected System-ah chuan mimal in Solar Power a hman sen loh chu Electric pekna thirhrui-ah a pechhuak leh thin a, hei hi midang tan pawh a tangkai leh zel thei a ni, a ti. Nizung eng chakna ringa Khawn-var siam (Solar Lamps) 1,44,705 lai zirlai pawl 10 chin hnuailam hnenah semchhuah chu lawmawm a tih thu sawiin, he hmalakna atang hian hmasawn tur a awm tih a sawi bawk.

ZEDA report in a tarlan dan chuan 90% Subsidy hnuaiah Village Council ten Solar Street Lights an lei thei a, Off Grid Solar PV Power Plant 90% subsidy hmangin sawrkar pisa leh mipui vantlang hmunhma ah te eng a chhit theih bawk a; zirlai class 10 chin leh a hnuailam tan 85% subsidy in solar lamp a lei theih bawk. Heng bakah hian Grid Connected Solar Rooftop Systems hnuaiah mimal in Solar Power plant an siam tir thei a, sawrkar office building-ah te pawh a theih bawk a ni. Tunah hian Off Grid Solar PV Power Plant hi ZEDA in a kalpui a, Grid Connected Solar Rooftop Systems chu P&E Department in a kalpui a ni.


Bamboo Link Road sawihona nei :

Chief Minister Zoramthanga hovin nimin chawhma khan Bamboo Development Board leh Bamboo Link Road Board te chu CM Conference Hall-ah Joint Meeting an nei. He Meeting-ah hian Mau leh Rua hmanga ei leh bar-a State tih hmasawn kawnga Link Road siam chungchang sawiho a ni a. Mau thahnem tak awm mahse Processing Plant thlenga phur turin kawng mumal a awmloh avanga Mau hralh man aia phurh man a tam zawk thin avangin Mau hralhtute tan a hlawklo in, Processing Plant lamin a tuar phah bawk thin a. Heng harsatna te hi sukiang turin sawrkar laipuia thuneitute chu Chief Minister leh Planning Department hotulu te'n Bamboo Link Road siam a tulna te an lo sawipui tawh a. Sawrkar laipui pawhin Bamboo Link Road siam tura project duang tur leh sum pekna tur pawh ngaihtuah ho zui tur a nih thu an sawi a ni.

Bamboo Link Road siamna tur hi Board Member te chu Group a insiamin hmun hrang hrang an lo thlithlai tawh a. Nimin-a Meeting-ah hian report pe in, Pilot Project atana hmalak hmasak theihna tur remchang a langte an sawiho a. Bawhzui zel turin Bamboo Development Board leh Bamboo Link Road Board Member te ve ve atangin pawl a insiamin, ruahmanna ngaihtuah zui nise tia rel a ni.


Chief Minister in hnathawh mek enfiah

Chief Minister Zoramthanga chuan nimin zing khan Aizawl Chaltlang DIET peng kawng zauh leh siamthat hna thawh mek chu a hmunah tlawhin a enfiah a. MBSE building sak mek en bawkin, quarters sakna tura ruahman te a en bawk. Chief Minister hi Engineer-in-Chief Lalmuankima Henry leh PWD thawktu dangte'n an tawiawm a, Ramhlun-a Industry hmunhma te a enfiah nghal bawk.


DC Office kang thenfai hnatlang nei :

Zirtawpni kalta zing-a Aizawl DC Office kang ta thenfai hnatlang chu nimin khan Office hnathawktu ten an nei a, DC Office-a thawk pension tawhte bakah Tuikual Local Council ten an pui bawk a ni. Aizawl DC Office hi kumin chhung mipui tan dawr theih anih dawn loh thu puanzar a lo ni tawh a. Aizawl DC Dr. Lalhriatzuali Ralte chu Aizawl SP Office-ah thutna ruahman sak lai-lawk a ni a, Multi Level Car Parking, MINECO chu DC Office atan cheibawl phawt niin pangngai taka mipui tan dawr theih an nih hun tur erawh hriat a ni lo. Aizawl DC Office kang ah hian a thenawm a Aizawl Press Club leh MHIP Office te pawh tukverh thenkhat kang chhiain a chhunga bungrua awm pawh a chhe nual a. A bul hnaia awm I&PR Office current line te pawh a kang chhia a ni.

Sawrkar hnathawk tan thupek siam :

Hunpui lo thleng tur denchhen hian Supplier leh Office tlawhtu mi thenkhatin sawrkar Official te hnenah Halpuah leh halmawi a thlawna pek an ching tih hriat a ni a. Hemi chungchangah hian General Administration Department (GAD) changtu Addl. Chief Secretary JC. Ramthanga chuan tun thla ni 14 khan thuchhuah siamin sawrkar hna-thawk zawng zawng te chu hetiang thil pek dawng lo turin a hriattir a. State Sawrkarin Krismas leh Kumthar vuakvetah halpuah leh halmawi lam chi reng reng kawl, lei, hralh leh hal a khap a. Hei vang hian sawrkar hnathawk zawng zawng te chu he thupek hi zawm vek turin khauh takin thupek a tichhuak a ni.


SEDP hnuaia LR&S hmalakna tur thlirho :

Nimin khan Land Revenue & Settlement (LR&S) Minister Lalruatkima hovin a pisa-ah Land Revenue & Settlement Board Vice Chairman Rochhunga Ralte leh Department Officer te thu-khawmin Mizoram Sawrkar flagship programme, Socio-Economic Development Programme (SEDP) hnuaia hmalakna tur Action Plan an thlirho a. SEDP 2021-2022 hnuaiah LR&S chuan cheng nuai 52.81 senna tur ruahmanna ‘Survey and Re-Survey of land for allotment, regularisation of unregistered land holding and updating of survey and settlement record of Saitual District’ tih an buatsaih a. Thla 4 chhunga thawh zawh tura ruahman niin Saitual Town chhung, Keifang, Rulchawm, Rual-lung leh Sihfa ah te hmalak tum a ni.

He hunah hian Sawrkar in House Pass a pawmpui tawh a neituten an lam loh tam tak awm mek chungchang pawh sawiho a ni a. Section 128 and 129 of the Mizoram (Land Revenue) Act, 2013 tlawhchhanin LR&S chuan hemi kaihhnawih ah hian hriattirna a lo tichhuak tawh a. Land Record vawngtu Revenue Officer chuan 18.11.2019 hmalam zawnga ram allot tawh te chu sawrkarin a pawmpuina ziakin lehkha emaw, electronic emaw chanchinbu hmangin a hriattir anga. Engemaw harsatna bik nei, pass lam thei lo te chuan lehkha pek chhuah (issue) a nih atanga ni 90 chhung hian an lam theih loh chhan Revenue Officer an hriat-tir ngei tur a ni. Revenue Officer in an harsatna a zirchian hnuah a pawmpui a nih chuan huntiam a pawhsei sak anga. Huntiam chhung leh pawhsei sak hun chhung pawha an lam lo a nih chuan Dan tlawhchhana phalna (allotment) hnuhlet a nih theih nan Revenue Officer hian hma a la ang.

Hei bakah hian District hrang hranga LR&S Office ruhrel chei that chungchang te, Staff indaih-lohna chungchang te pawh sawi lan a ni bawk.

MSHCS Governing Body Meeting nei :

Nimin khan Chief Minister Zoramthanga hovin Mizoram State Health Care Society (MS-HCS) Governing Body Meeting vawi 26-na chu CM Conference Hall-ah neih a ni. He Meeting-ah hian kum 2022-23 chhunga policy hnuaia inziah-luh (enrollment) chungchang sawiho a ni a. Tuna policy kalpui mek hi 31.3.2022 ah tawpin, enrollment pawh a thar a tih leh a ngai dawn tawh a. ABPM-JAY chuan National Food Security Act (NFSA) 2013 data behchhan a kalpui a ruahman tih hriat anih angin leh, MSHCS hi ABPM-JAY nen thil tam taka kal kawp a nih avangin state Scheme ah pawh NFSA Act, 2013 data behchhana enrollment tih ni se, tia rel a ni a.

Enrollment Fee atan hian AAY (Card eng) holder tan Rs. 200, PHH (card pawl) holder tan Rs. 1000 leh midang zawng (card var) tan Rs. 2000 ruahman a ni. Hemi bakah hian ABPM-JAY kalpuina atana thawhpui (supporting agency) rawih mek Paramount Health Services and Insurance TPA Pvt Ltd. te chu an thawhho term a zawh dawn tawh avangin leh, an thawh that avangin renew leh ni se an ti a ni. Enrollment tam zawk neih theih nan a hma lak ni se tiin, ruahmanna te siam a ni bawk.


Seismic Broadband Station hawng :

Mizoram sawrkar in Pachhunga University College (PUC) leh CSIR-NEIST, Jorhat, Assam te nen tangkawpa lirnghing chungchang zir-chianna atana khawl pawimawh tak, Seismic Broadband Station Mizoram-a hmun pathum - Aizawl, Khawbung leh Lunglei-a bun tura a ruahman tawh angin nimin khan District Emergency Operation Centre (DEOC) Lunglei-ah Seismic Broadband Station hi Lunglei DC leh District Disaster Management Authority Chairman, Kulothungan A chuan a hawng.

Mizoram hmun thum-a Seismic Broadband Station dah hmang hian lirnghing data chhin-chhiah thin a ni anga. Data zawng zawng hi PUC, Aizawl Seismology Centre-ah vawn that niin, CSIR-NEIST leh Department of Geology, PUC-ah chiang zawka zirchian a ni ang.

Comments

Popular posts from this blog

Volleyball S/F khel dawn