Latest News

Serchhip District-ah Lok Sabha Inthlanpui atana inbuatsaihna kal mek thlirho a ni

Image
Lok Sabha Inthlanpui neih tur atan Serchhip District-ah inbuatsaihna kalpui mek a ni a, he Inthlanpui neih tur atana inbuatsaihna hrang hrangte thlir hian nimin khan Serchhip-ah District Election Offficer leh Bawrhsap David Lalthantluanga hovin Nodal Officer te chu an thukhawm a ni.

Kum 2021 chhunga Thinglian khua Buh leh thlai thar lawmna Kutpui hman a ni

Serchhip District chhunga Thinglian khua chuan nimin khan ‘Kum 2021 chhunga Thinglian khua Buh leh thlai thar lawmna Kutpui’ an hmang a, he hun hi bialtu MLA leh Assembly Deputy Speaker Er. Lalrinawma chuan khuallian niin a hmanpui a ni.

Thinglian Public Playground-a he hun hman ah hian bialtu MLA Er. Lalrinawma chuan, Thinglian khaw-tlang in buh leh thlai thar Kut buatsaih thei khawpa malsawmna an dawng chu lawmawm a tih thu sawiin, khaw taima leh thawkrim tak an nih zia a langfiah hle a ni, a ti a. Covid hri leng lakah Vawiin thlenga Thinglian khua an la him theih zarah mipuiten hna an thawk thei a, kan thawhrimna te Pathiani n malsawmin Vawiin ah an thawhrim rahte hlim takin an lo lawm thei ta nia a hriat thu sawiin, Thinglian khawtlang a lawmpuiin a chhuang hle tih a sawi bawk.

Bial a enkawlnaah eizawnna tihhmasawn chu a ngaih pawimawh ber te zinga mi a ni tih Bialtu MLA chuan sawiin, hemi kawnga hma an sawn zel theih nan MLA Fund leh Fund dang awm thei ang chi te hmangin hma a la tih a sawi a. Chung hmalakna te chuan rah tha a chhuah chho mek nia a hriat thu pawh a sawi. Tuikum bial chu ram lailia awm an nih avangin khawpui lian Aizawl, Lunglei, Serchhip leh Champhai-ah te an tharchhuahte hralh theihna remchang an nei tha tih sawiin, “Kan hman tangkai thiam a tul takzet a ni,” a ti a, “Kan chhehvela hna-thawh tur hnaivai ber ber te hi kan thawh thiam chuan hna hmuhloh a awm dawn lova, ram leh hnam chhanna hnathawk kan ni bawk a ni,” tiin Thinglian mipuite chu nasa zawka bei sauh sauh turin a fuih bawk.

Thinglian khua hi Tuikum Assenbly Constituency huamchhunga awm niin In 84 awmna khua a ni a, mihring 531 cheng mekin, lonei-a eizawng chhung-kua 55 an awm a. Kumin 2021 hian Buh Tin 11,294 (Phur 3765) an thar a. Buh thar tam ber hi Lalpian-thanga niin Tin 447 (Phur 149) a thar a, F. Ramdin-sanga'n dawtin Tin 402 (Phur 134) a thar a, pathumna hi Lalrelliana niin Tin 399 (Phur 133) a thar a ni. Thlawhhma kawngzawh upa ber Chawimawina chu kum 65-a upa Lalthangpuii hnenah hlan a ni.

Nimin-a he hun hman hi an VC Secretary Jerome Hmingthansanga chuan a kaihruai a, he hunah hian zirtirtu thaa thlan A. Lalthangkawla (L) leh sawrkar hnathawk thaa thlan K. Lalramsangi te hnenah chawimawina hlan an ni bawk.

Comments

Popular News (Last 30 Days)