Hri kai enkawllai mi 1369 an la awm mek

Krismas hman zawh a nih hnuah Mizoram-a hri kai hmuhchhuah an pung chho leh hret hret a, nimin tlai thleng khan hri kai enkawllai mi 1369 an la awm a ni.

Mizoram-a COVID-19 hri kai hmuhchhuah hi December 22 khan 241 awmin December 23-ah 111 leh December 24-ah 173 an awm a, December 25-ah hri kai mi 65 chauh hmuhchhuah awm mah se December 26-ah 72-ah kaiin December 27-ah 184 hmuh leh an ni a, niminpiah December 28-ah khan hri kai mi 107 zet hmuh belh an ni leh a ni.

Niminpiah-a hri kai hmuhchhuah te hi ZMC-a RT-PCR Laboratory atangin Aizawl District-ah mi 14, District hrang hranga TrueNat Laboratory atangin Champhai, Kolasib, Aizawl, Serchhip leh Khzawl District atangin mi 15 leh Rapid Antigen Test hmangin mi 173 te an ni a, Rapid Antigen Test hmanga hri kai hmuhchhuah zingah hian Aizawl District tam berin mi 58 zet hmuhchhuah an ni.

Nimin khan tlai dar 5:00 thlengin hri kai mi 114 te enkawl dam an ni ve leh bawk a, heti hian nimin tlai thlenga Mizoram-a hri kai hmuh tawh chu 1,40,955 niin an zinga 1,39,045 te chu enkawl dam an ni tawh a, hri kai hmuhchhuah atanga za zela 98.65 te chu enkawl dam ni tawhin hri kai enkawllai 1369 an la awm a, hri kai zingah mi 541 an boral tawh bawk a ni.

Mizoram District hrang hrang zingah Aizawl District chu hri kai enkawllai tamna ber la ni chhunzawm zelin mi 512 enkawl mek an la ni a, Mamit District in dawtin mi 197 enkawllai an awm a, Kolasib District-ah 132, Khawzawl District-ah 128 leh Serchhip District-ah 110 te chu hri kai za aia tam enkawllai la awmna an ni a. Hri kai enkawllai awm lohna District la awm lovin hri kai enkawllai tlemna ber Lawngtlai District-ah mi 14 enkawl mek an ni a, Siaha District-ah 15 leh Hnahthial District-ah 16 te chu hri kai enkawllai tlem zualna an ni a, Saitual District-ah 70, Champhai District-ah 77 leh Lunglei District-ah mi 98 enkawl mek an la ni bawk.

Comments

Popular posts from this blog

Volleyball S/F khel dawn