PAHOSS hnuaia Aizawl khawpui chhunga Parking House sak zawh 11 te hawn a ni

Parking House Support Scheme (PAHOSS) hnuaia Aizawl khawpui chhunga Parking House sak zawh 11 te chu nimin khan Chief Minister Zoramthanga, Deputy Chief Minister Tawnluia leh AMC Mayor Lalrinenga Sailo te chuan an hawng.

Parking House hawn te hi an awmna Veng azirin Zone pathum - North Zone, South Zone leh West Zone-ah thenin, Chief Minister chuan North Zone-ah kalin, Deputy Chief Ministe Tawnluia chu West Zone-ah a kal a, AMC Mayor Lalrinenga Sailo chu South Zone-ah kalin heng Zone theuha Parking House te an hawng a. Parking House-te a hmuna hawn zawh hian Hyve-Aizawl City Hall-ah hawnna inkhawm buatsaih leh a ni.

Chief Minister Zoramthanga chuan PAHOSS beneficiary, Parking House sa zo tawhte chungah lawmthu sawiin, PAHOSS thiltum chu tihhlawhtlin zel a nih theih nan leh khawpui hmasawnna ruhrel din tura hmalakna hrang hrangte tihlawhtling tura sawrkarin theihtawp a chhuah zel tur thu a sawi a. Mimal, Pawl leh ram hmasawn nan hmathlir tha neih a pawimawhzia sawiin Chief Minister chuan, thil tha ngaihtuahchhuak tura mahni remhriatna hmanthiam kawngah theihtawp chhuah a pawimawh thu a sawi a. Hmasawnna dangtu anga langte pawh hmasawnna atana tangkai a hman zawk dan zawn thiam a tul thu a sawi.

Parking House Support Scheme (PAHOSS) hi State Flagship Programme niin he Scheme in a tum ber chu khawpui chhunga Traffic Jam nasa tak sutkian nana Parking space tam zawk siam a ni a. A bikin mimal leh pawl Parking House siamthei te hnena tanpuina pek a nih theih nana ruahman a ni. Sawrkarin kum 2019 tir lama hun reilote chhunga a duan a ni a, February ni 6, 2019 khan Chief Minister chuan a hawng a ni.

PAHOSS hnuaiah hian Committee pahnih awmin Chief Minister kaihhruai Parking House Committee leh Chief Secretary kaihhruai Executive Committee on PAHOSS te an ni a, PAHOSS hnuaia Parking House chu a tlem berah LMV panga (5) emaw Two Wheeler paruk (6) emaw dah theihn a ni tur a ni a, a tam lamah erawh bituk awm lovin LMV pakhat (1) emaw, Two Wheeler (6) emaw park theihna zelah cheng nuai khat zel tanpuina dawn theih a ni a. LMV pakhat dahna tan 4.5mx2.5m leh Two Wheeler pakhat tan 0.8mx2.5m a zau tura duan niin, PAHOSS tanpuina dawngtu te chuan kum 10 tal parking atan an hmang tur a ni.

Nimin a hawn tak Parking House sak zawh 11-ah hian LMV 71 leh Two Wheeler 309 dah theih tura ruahman a ni a, a vaiin hemi atana sum sanction chu cheng nuai 121 a ni.