Kangmei venna kawnga hmalak dan tur sawiho

State Level Sub-Committee on Fire Prevention chu nimin khan thukhawmin kumthar lama kangmei venna kawnga hmalak dan tur an sawiho.

He thutkhawm Environment Forest & Climate Change changtu Minister leh State Level Sub-Committee on Fire Prevention Chairman TJ. Lalnuntluanga hova SAD Conference Hall-a neih ah hian kumin 2021 kum tira Mizoram in kangmei a tawrh nasat dan leh a nghawng te thlirho a ni a. Minister chuan nikuma harsatna kan tawhte thlirletin, kum thar lo awm tur atana ruahmanna hma taka kalpui a ni chu tha a tih thu a sawi a. Kan harsatna tawhte hre reng a, kum 2022 Thal hmachhawn tura inpuahchahna tha tak neih a tul thu a sawi bawk.

Committee chuan kum 2022-ah Fire Prevention Week chu February ni 7 atanga February ni 12 inkarah hman ni se tiin a rel a. Kum 2022 kangmei ven thupui (Theme) atan ‘Kangmei chhuak tur ven mitin mawhphurhna’ tih chu thlan a ni a. Lo hal hun ni hnuhnung ber atan March ni 15, 2022 chu ruat a niin hemi hnu lama Lo hal emaw, bawhchhiate chu Dan hmanga hrem an nih theih nan District thuneituten ruahmanna siam se an ti bawk.

Kum danga tih thin dan ang bawkin, kum 2022-ah pawh kangmei ven kawnga titha zual District pathum leh, District tina titha zual khaw 3 thlanchhuah thin chu kalpui leh a ni ang.