Mahni pasal thattu damchhung tang turin rel sak

Nikum December ni 9 zan-a Dr. Laltanpuia (43) Kulikawn vithlumtu a nupui Mary Zothansangi chu Court-in damchhung lung In tang tur leh cheng nuai 1 chawi turin a hrem.

Mary Zothansangi hrem a nih dan hi nimin khan Addl. District and Session Judge, Dr. HTC Lalrinchhana chuan a puang a. IPC section 302 hmangin thiamloh chantirna ah damchhung lung In tang tur leh cheng nuai 1 chawi turin a ti a. A pawisa chawi tur hi a pek theih loh chuan kum 1 dang a tan belh dawn a. MLP Act hmanga thiamloh chantirna ah thla 5 tang tur leh Rs. 40,000 chawi turin a ti a, pawis a pek theih loh chuan thla 2 dang a tan belh dawn a ni. Court chuan heng hremna hi kalkawp tur a ni lo tih sawiin, MLP Act hmanga hremna chu a tlak phawt ang a, chumi hnuah IPC section 302 hmanga damchhung lung in tang tura hremna chu kal tan pui leh a ni dawn a ni. Court-in Mary Zothansangi damchhung lung In tang tura a hremna hi damchhung tak tak a ni a, chutihrual chuan a nungchang leh khawsak phung a zirin Sawrkar-in a tan hun tur hi a pawh tawi sak thei thung a ni.

He thubuai ngaihtuahna ah hian Sawrkar Ukil lam chuan pawi-khawihtu Mary Zothansangi chu Zu in nasa a nih avangin na lehzual hrem an duh thu thlen rualin, a tuartu Dr. Laltanpuia chhungte chuan Mary Zothansangi chu an tute nu a nih avangin thi tura hrem lo turin Court chu Sawrkar Ukil kaltlangin an ngen thung a. A fa naupang te te 3, a upa ber pawh kum 11 mi, a pa thawhchhuah hmanga khawsate chu Victim of Crime Compensation atanga zangnadawmna pe turin an ngen bawk a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man