Micro Enterprises harsatna tawk te tan hma la

Commerce & Industries Minister Dr. R. Lalthangliana chuan ‘Proposal for Special Economic Package’ chungchangah sawrkar laipui a mi pawimawh hrang hrangte a kawm.

Kumin Nov. 18-a North-East MSME Conclave, Guwahati-neih a nih tum-a Union Minister for MSME Narayan Rane-a’n thurawn a pek anga hripui lengin Mizoram-a Micro Enterprises enkawltu harsatna tawk chhungkaw 50,000 khaichhuahna tur ‘Proposal for Special Economic Package’ chungchangah hian Dr. R. Lalthangliana chuan niminpiah khan Union Minister Narayan Rane bakah DoNER Minister G. Kishan Reddy leh Union Finance Secretary Dr. TV. Somanathan te chu an Pisa-ah a tlawh a. Mizoram-a Industry te dinhmun leh Covid-19 hripui vanga Industrial Unit-ten harsatna an tawh hrang hrang te sawipuiin, hripui leng vanga eizawnna tlachhiate chhanchhuahna tur Central Sawrkar atanga tanpuina pek an nih loh chuan Industrial Unit tam tak chu hnathawk chhunzawm thei lo va khar mai hmabak an ni tih sawiin, Micro Enterprise te chhanchhuahna tur ‘Proposal for Special Economic Package’ sawrkar laipui-a an thehluh tawh chu tih hlawhtlin sak ngei turin a ngen a ni.

Dr. R. Lalthangliana chuan heng sawrkar hotute hnenah hian Mizoram-a Industrial Unit zinga 97.36% chu Micro Enterprises te an nih thu sawiin, an dinhmun a that chuan Mizoram economy pawh nasa takin a mumal theih phah dawn a ni, a ti a. MSME guidelines nen inmil lo deuh pawh nise a pawimawhzia an hriat sak a tul thu a sawi bawk. Sawrkar laipui-a Minister leh thuneitute pawimawh dang a hmuhte chuan Dr. R. Lalthangliana hi tha taka lo dawngsawngin, proposal chu uluk taka an lo zirchian tur thu leh a hlawhtlin theihnan theihtawp chhuaha hmalakpui an tum thu an lo hrilh a ni.