MPCC President thar-ah Lalsawta puan a ni

Mizoram Pradesh Congress Committee (MPCC) President nihna chu nimin khan Lal Thanhawla chuan President thar Lalsawta hnenah a hlan ta.

Congress Party hian kumin 2021 chhunga Congress Bhavan kharna leh MPCC Elected Office Bearers te Official-a puanchhuahna hun hi nimin khan an hmang a, he hunah hian MPCC hruaitu tur ruatna chu MPCC General Secretary Lalthanglawra Ngurte chuan chhiar chhuakin Congress President thar atan Lalsawta, Vice President atan Lal Thanzara leh Treasurer atan Zodintluanga Ralte MLA te an nih thu a tarlang a, Comm. Lalkiamlova’n hruaitu tharte Pathian hnena hlanna hun a hmang bawk a ni.

He hunah hian MPCC President kalchhuak tur Lal Thanhawla chuan Congress President a nihnaah a term la hmang zo lo mah se hruaitu thar leh tha zawkte tan hmun ken a ngai ve tawh a ni tih hriain tu nawrna mah tel lovin a chawlh tur thu hi a OB puite hnenah a lo sawi tawh thu leh ama thutlukna a nih thu a sawi a. “Hruaitu thar tha tak tak kan nei ta a, tangkaina ka neihna ah an hnungah ka ding tlat dawn a, full support ka pe a ni,” a ti.

MPCC President thar Lalsawta pawhin kan ram chu run-in a awm mek nia sawiin, “Kan hneh let ngei ngei tur a ni. Indo laiin nu leh pa ten an fate an chan thin a. Ram a muan lai erawh chuan faten nu leh pa an chan thin. Vawiin ni-ah thalai engemaw zat kan inchan mek a, hemi solve-na tur chu Sawrkar tha neih hi a ni,” a ti bawk.