Serchhip District Hospital a hmun ngai a sa turin Sawrkar in ruahmanna siamin hma a la mek

Mizoram sawrkar chuan tuna Serchhip District Hospital awm mekna ah District Hospital sa turin ruahmanna a siam a, hemi atan hian DPR pawh siam ni tawhin bawhzui mek a ni a. Damdawi In sakna tura NGO Coordination Committee leh Town chhung VC te rawtna siam chu sawrkar hnenah thlen leh ala ni lo thung.

Tunhnaia Serchhip Thalai Pawl (STP) ten Serchhip damdawi In chungchang RTI hmanga zawhna a chhanna ah Hospital & Medical Education-a Joint Director Dr. PC. Lalramliana chuan Serchhip District Hospital thar sakna tur hian ruahmanna a awm tawh thu leh Detailed Project Report (DPR) siam tawh a nih thu a tarlang a, tunah hian Rural Electrification Corporation (REC)-ah Corporate Social Responsibility (CSR) atanga sum hmuh turin thehluh a nih tawh thu leh District Hospital sakna senso atan hian Civil Work-ah cheng vbc. 18.47 ruahman niin, Hospital bungraw lei nan cheng Vbc. 2.53, a vaiin cheng vbc. 21 senna turin ruahman a ni tih tarlan a ni bawk. RTI hmanga zawhna chhanna atanga a lan danin District Hospital len zawng tura ruahman hi 3763.00 Sq.m a ni a, khum 100 awm theihna tur a nih bakah Male Medical Ward, Male Surgical Ward, Geriatrics Ward, Female Medical Ward, Female Surgical Ward, Gynaecology Ward, Maternity Ward, Ante-Natal Ward, New Born Ward, NICU, Paediatric Ward, Opthalmology Ward, Ortho Ward, Isolation Ward, Private Cabin leh Infectious Disease Ward-te awm ang.

Serchhip Thalai Pawl chuan thuchhuah siam zui nghalin hun rei tak chhung Serchhip District Hospital sak that loha awm tawh chu mipui nawlpui hriat lem lohin sawrkarin nasa taka hma lo lain, thil thui tak a lo kalpui tawh avangin sawrkar chungah an lawm hle tih an sawi a. Chutih laiin, Serchhip mipuite aiawhin Serchhip NGO Coordination Committee-in Serchhip Town chhung VC zawng zawng aiawh leh Joint VC aiawhte kokhawma District Hospital sak thatna hmun tur atana lungrual taka an lo thlan tawhna hmun ah District Hospital thar sak a ni dawn lo tih RTI chhânna atanga an lo hriat thu pawh tarlangin, “Nakin hun lo awm zel tur leh Serchhip khawpui thang zel tur thlirin Serchhip Thalai Pawl chuan Serchhip NGO Coordination Committee leh Town VC-ten thutlukna an lo siam tawh hi a zahin a thlawp em em a ni,” an ti bawk.

JN Hospital, Serchhip tia hriat thin, Serchhip District Hospital tih tak sakna atan hian May 27, 2011 khan khatihlai Chief Minister Lal Thanhawla chuan lungphum phumin Serchhip Chanmari Veng-a Lawibual ram-ah damdawi In sak tura ruahman a ni a. Amaherawh chu a hmun thu ah harsatna hrang hrang a awm zui tak avangin hmalak zui a ni ta lawk lo a. Nikum (2020) khan Serchhip District Bawrhsap in Serchhip District Hospital building thar sakna tur inlungrual tlanna hmun remchang lo ngaihtuah nawn tura NGO Coordination Committee te a ngen angin Sept. 16, 2021 khan NGO Coordination Committee hian NGO Coordination Committee-a tel pawl te leh Town chhunga VCP tin bakah Joint VC aiawhte chu kokhawmin he huna tel te hian ‘Chhiahtlang ramchhung a Bukpui Power & Electricity Department ram leh ITI hmun tura buatsaih mek inkar Vantlang ram awl (Free Land) hi Serchhip District Hospital hmun atan rawtna thlen nise kan ti’ tiin thutlukna an siam a, he an thuthlukna hi a tuk Sept. 17, 2020 khan Bawrhsap hnenah hian an thlen nghal a ni.

Hemi hnu hian thuthar a awm lawk loh hnuah Dec. 9, 2021-a Health & Family Welfare Board Vice Chairman hova Health Secretary leh Serchhip-a NGO hrang hrang bakah thuthar thehdarhtu te inkawmna ah Health Secretary chuan damdawi In sakna tur chungchang an rel hi an hriat thu leh ziakin engmah an la dawn loh thu a sawi ta thung a, NGO Coordination Committee lam hian tun thlengin an la thlen nawn leh ta lo thung a ni.