Mathematics chawilarna atan Serchhip-ah ni khat awh Seminar neih a ni

National Mathematics Day-2021 lo thleng tur pualin nimin khan Govt. Serchhip College-ah ‘One Day National Seminar on Mathematics Popularisation’ buatsaih a ni a, Mizoram Science, Technology & Innovation Council (MISTIC)-a Member Secretary leh Chief Scientific Officer Er. H. Lalsawmliana chuan khuallian niin a hmanpui a ni.

Mizoram Science, Technology & Innovation Council (MISTIC) leh Govt. Serchhip College tangkawp in an buatsaih ‘One Day National Seminar on Mathematics Popularisation’ ah hian Er. H. Lalsawmliana chuan MISTIC hmalakna te sawiin, Mathematics chawilar zel an tumna kawngah zirlai naupang ten nuam ti taka Mathematics Subject an zir theihna turin Zirtirtute chu an pawihmawh hle tih a sawi a. He huna tel zirlai te pawh Mathematics nuam ti taka zir thei tur chuan beih nasat a ngai ti-a fuihin, chu chu zirlaite mawhphurhna anih thu leh Subject dang ang bawka tuichilh peih a ngai tih a sawi a, tumruhna leh tawrhchhelna neih a ngai tih a sawi bawk. Mathematics chu Subject zawng zawnga a pawimawh berte zing ami anih avangin eng hna pawh thawk dawn ila, a tlanglawn tal chu hriat ve a ngai tih pawh sawiin, Serchhip a zirlai naupang te nen hun tha tak an hmangho thei chu lawmawm a tih thu a sawi bawk.

Govt. Serchhip College-a Assistant Professor C. Lalramliana kaihhruai he hunah hian khual zahawm he College Principal PC. Lalremsiama chuan Mathematics chu mihring nitin nun hmanna ah thil pawimawh tak a ni tih sawiin, khawvel thiamna leh finna sang zelah Mathematics tel lovin hun a hman theih tawh lova, eng hna pawh thawk dawn ila, Competitive Exam te thleng pawhin Mathematics subject chu a pawimawh tawh a, hei vang hian Mathematics ruangam tal chu kan hriat a ngai tawh a ni, tiin Mathematics pawimawhna a sawi bawk.

Nimin-a ni khat awh he Seminar-ah hian Govt. Serchhip College-a Dept. of Mathematics atangin Assistant Professor Dr. Lalhmangaihzuala leh Andrew Lalchullova ten Serchhip a High School leh Higher Secondary School te bakah College zirlai naupangte hnenah a lem nen a lantirin zirtirna an pe a, Dr. Davy Lalruatliana, Scientific Officer & Co-ordinator of National Mathematics Day, MISTIC hnen atang in report ngaihthlak a ni bawk.

India rama Mathematics thiam chungchuang Srinivasa Ramanujan-a pian ni, December 22 chu ‘National Mathematics Day’ atan hman niin MISTIC hian he ni pual hian kumtin hun an hmang thin a, State Level Mathematics Competition te, Mathematics Summer Camp te, Mathematics Subject tihlar zel nana hmalakna atan leh Mathematics Subject a sulhnu nei tha bikte chawimawina leh lawmpuina atan te hun hman thin a ni.