ZPM Thalai ten pawisafai sem an duhlo tih an sawi

ZPM Thalaite chuan pawisafai sem chu mipuite rilru leh sûkthlêk tichhetu a nih avângin an duh lo tih an sawi.

Nimin-a Aizawl Press Club a thuthar thehdarhtute an kawmna ah ZPM Thalai General Secretary J. Lalramnghaka chuan kum 2018 inthlanpuia MNF in an intiamna, SEDP cheng nuai thum aia tlem lo, nuai thum chung lam sem chu an term tawp lamah a taka kalpui a nih tur thu an sawi tan ve chauh tih sawiin, tih loh tawp aiah chuan a tha hrim hrim tih a sawi a. ZPM chuan pawisafai sem chu mipuite rilru leh sûkthlêk tichhetu a nih avângin an duh lo tih sawiin, “MNF erawh chuan an duh a, an intiam a, duh a intiamte chuan an intiam ang ngeiin an sem ngei tur a ni tih hi ZPM Thalai dinna a ni,” a ti.

Hetih rual hian, Mizoram Budget atanga sem a nih erawh chuan, tuna kan Chief Minister-in opposition an nih laia fiamthu thawhna atâna NLUP a lo hman tawh ang, ‘Thlâm bang chhak lam sah thlâk a, bang thlang lama bel, a sahthlâk lama awmte chu ruah sur leh khawvawt tuara khur char chara awm’ a lo tih nen khan SEDP hi thuhmun reng a ni dawn tih pawh sawiin ZPM Thalai General Secretary chuan, “SEDP hi Mizoram budget atanga sem lovin, kan Chief Minister ngeiin a lo sawi tawh, budget pawn ami khurpui khawh lût chur chur, thâl sen loha liam zur zur ami ngei kha thâl a, sem turin kan chah a, mipuite retheihna belhchhah turin Mizoram budget atanga sem lo turin kan chah a ni,” a ti bawk.