Latest News

MIZOFED kum 40 tlin lawmna Cooperation Minister hovin neih a ni

Mizoram State Cooperative Marketing and Consumers Federation Limited (MIZOFED) chuan nimin khan an kum 40 tlinna, Ruby Jubilee lawmin Cooperation Department changtu Minister C. Lalrinsanga chuan a hmanpui a ni.

Taxation Department Auditorium, Aizawl-a MIZOFED kum 40 tlin lawmna ah hian Cooperation Minister chuan MIZOFED dinhmun tha chho mek chu lawmawm a tih thu sawiin, mihring hi kan upat chhohin kan chak lo tulh tulh a, Pawl leh Corporation te erawh an upat chhoha an chak loh chuan inenletna tur an neia, a tha lo lai siamthat ngai a awm tihna a ni, a ti a. MIZOFED chu Mizoram pawl lian tak mipui rawngbawlna an thawh mai bakah sumdawnna pawl lian tak a nih thu sawiin, thanna nasa tak an nei thei a, nasa leh zuala District khawpui leh khawpui dangah te mipui mamawh hrang hrang phuhru a, inzarpharh zela hlawhtinna nei zel turin a duhsak thu a sawi bawk.

Cooperation Minister chuan hripui lenlaiin Vegetable Supply Chain-ah MIZOFED in an thawhhlawk thu leh mipuiin an hlut thu te sawiin, changtlung leh phuisui zawka Vegetable, Fruits leh Livestock Supply Chain kalpui dan ngaihtuah a ngai tih a sawi a, hemi kawngah hian RKVY hnuaia sak tur thei leh thlai dahthatna Cold Storage leh thil dangte chu tangkai takin kan hmang thei dawn nia a hriat thu a sawi bawk.

MIZOFED Ruby Jubilee lawmna hun hi an Vice Chairman K. Rothangpuia chuan kaihruaiin MIZOFED Chairman lo ni tawh leh tuna Turial bialtu MLA ni mek K. Laldawngliana chu khual zahawm a ni a, MIZOFED Managing Director Rinzuala’n report a pe bawk a ni.

MIZOFED hi December ni 9, 1981 khan Society pathum – Mizoram Wholesale Cooperative Stores Ltd.; Mizoram Apex Marketing Society Ltd. leh Mizoram Cooperative Super Market Ltd. te inchhun khawma din a ni a. Leiba cheng nuai 209.80 neisa in bul an tan a. Tunah chuan an sum veivir pawh kum khata vbc. 200 ai pawhin a tam tawh a, kum 2019-2010 ah hlep (Net Profit) cheng vbc. 9.30 leh kum 2020-21 ah hlep cheng vbc. 2.62 vel an thawkchhuak a ni.

Tunah hian Shareholders 323 awm mekin Board of Directors kum 5 zela inthlanna an nei a. Thawktu nghet mi 83, Muster Roll a thawk mi 54 leh Contract a thawk mi 33 an awm mek a. Mizoram khaw hrang hrangah Petrol Pump 8, LPG Distributor 6 leh SKO Designated Point 15 an nei mek a. Sumdawnna lian tak tak an kalpui te chu POL, LPG, mipui mamawh leina dawr Essential Commodities & Retail Stores te leh Oil leh Gas phurhna (Carrying contractor) te an ni. Mizoram mamawh POL zaa 40 chu MIZOFED lakluh niin Mizoram pumah LPG Consumer 81520 an nei mek a ni.

Comments

Popular News (Last 30 Days)