Chanchin thar thenkhat :

KCC-a hmalakna thlirho

Nimin khan Mamit DC Conference Hall-ah District Level Kisan Credit Card (KCC) Coordination Committee chu District Bawrhsap Dr. Lalrozama IAS hovin an thukhawm a, KCC hnuaiah hian Sangha khawi leh ranvulh mite tan hian cheng nuai 1.6 thleng engmah dahkham (Collateral) ngai lovin loan a pung tlem chi lak theih a ni dawn a, hemi aia tam loan la tur tan chuan dahkham a ngaiin cheng nuai 13 thleng dil theih a ni. He thutkhawm ah hian Realigned Operational Guidelines for National Livestock Mission (2021-2026) chungchang sawiho niin ran vulhtute tan cheng nuai 25 - 50 thleng subsidy Sawrkar laipui atanga dawn theih a nih thu leh mipui ten he hamthatna an dawn theihna tura hmalak dan turte sawiho a ni bawk.


SEDP Vice Chairman Pisa hawng

Commerce & Industries Minister Dr. R. Lalthangliana chuan nimin khan SEDP Commerce & Industries Development Board Vice Chairman K. Laldawngliana MLA Pisa thar chu Old Secretariat Building, Treasury Square-ah a hawng a, SEDP Board hrang hrang tangkaizia leh Minister-te hna nasa taka a chhawk zangkhai thu sawiin, COVID-19 avanga hmalakna tam tak a chak thei lo erawh pawi a tih thu leh, hei vang hian Economic Rivival Program duang chawpin Centre-ah na taka nawr a nih thu a sawi bawk.


MPF Annual Meeting nei

Mizoram People Forum ( MPF) Annual General Meeting vawi 14-na chu nimin khan Aizawl Vanapa Hall-ah neih a ni a, he hun hi an President Rev. Dr. C. Lalhlira chuan kaihruaiin Gen. Secretary Rev. R. Lalnuntluanga chuan an hma-lakna te tarlangin, kum 2022-2023 chhunga MPF Budget an pawm bakah MPF Dan Bu ennawn remtih a ni bawk. Nimin-a he hun hmanna ah hian ‘Kum 2023 MLA General Election atana inbuatsaih lawkna’ tih thupui hmanga MPF Vice President Rev. K. Lalrinmawia thusawi chu ngaihthlak a ni bawk.


Ramri kan-a thil tawlh sawiho

Nimin chawhnu khan Chief Minister Zoram-thanga hovin a Pisa-ah ram Dan kalh a ramri kân a bungraw hrang hrang tawlhruk thin laka hmalak dan tur chungchangah sawihona neih a ni a. He hunah hian ram thenawmte atanga damdawi, kuhva leh adangte dan kalh a rawn lut thin chungchang chu ngun taka sawihoin, a tul anga India sawkar nena hmalak theih dan tur kawng zawnga sawi-khawmna an nei a. Chiang leh zuala chiang turin Study Group siam a ni dawn a ni. He hunah hian C&I Minister leh Taxation Minister bakah sawrkar Department hotu pawimawh te an tel a ni.


Mizoram Team chak lo leh

Mizoram Cricket Team te chuan nimin khan Vijay Hazare Trophy khelh ah Nagaland chu run 80 zetin an hneh lo. Jaipur-a Soul Feel Cricket Stadium-a Mizoram leh Nagaland inhmachhawn ah hian Mizoram hi Toss-ah chakin vawm hmasak an thlang a, Nagaland hian Over 50-ah run 236 siamin mi 8 an out a, Mizoram vuak ve hunah Mizoram hi che fuh hlei thei lovin Over 48-ah an Out vek a, run 156 chiah an siam theih tak avangin run 80 zetin Nagaland hi an chak ta a ni.

Heti hian Mizoram hian match 5 an khelh tawh atangin tum 2 hnehna changin tum 3 chu a tlawm zawkah an tang thung a, point 8 hmuin 5-na ah an awm a ni.


Muaythai khel turte chhuak

United Muaythai Association India buatsaih National Senior National Muaythai Championship chu tun thla ni 16-20 chhung khian Imphal, Manipur-ah neih a ni dawn a, he Championship a Mizoram aiawh turte chuan nimin khan Aizawl chhuahsanin Manipur an pan a ni. Tun tumah hian Mizoram atangin player pali (4) kalin Coach leh Manager in an ho a, tunhnai State Championship neih atanga tel tur hi thlan a nih avangin kumdang aiin infiammi kal hi an tlem a ni.

Comments

Popular posts from this blog

Volleyball S/F khel dawn