Chanchin thar thenkhat :

(December 20, 2021)

Nawrh khapna tihchhuah a ni

COVID-19 hripui lengin Mizoram a tihbuai nasat avang leh mihring nunna chhan tura theihtawp chhuah a nih mek avangin Health & Family Welfare Department Secretary R. Lalramnghaka chuan nimin (December 19, 2021) tlai khan Health & Family Welfare Department hnuaia thawkte zingah nawrh/strike phal a nih loh thu Section 3 of the Mizoram Essential Services Maintenance Act, 1990 tlawhchhanin thupek a chhuah a. He thupek zawm lote chu Section 6 of the Mizoram Essential Services Maintenance Act, 1990 in thuneihna a pek angin hrem an ni ang a, he thupek hi sut leh a nih loh chuan December ni 19, 2021 zan dar 7:00 atanga thla 6 chhung a ding ang. Hetihlai hian Mizoram-a National Health Mission (NHM) hnuaia thawktu, National Health Mission Employees Union Mizoram (NEUM) te chuan sawrkar-a an thilphut hrang hrang tih hlawhtlin ngiatin Zirtawpni atang khan tiamchin awm lovin nawrh an huaihawt mek a ni.


MAL Book of the Year thlang

  Mizo Academy of Letters (MAL) chuan “Book of the Year 2020” atan Dr. Rema Chhakchhuak ziah ‘Eng Nge I zawn? (Zofa Kristiante kan Tamchhawl’ tih chu an thlang a. MAL ‘Book of the Year’ hi kumtin MAL Foundation Day, April ni 23-ah hlan thin ni mah se kumin hian hri leng avangin a hun pangngai ah hlan theih a ni lova, he chawimawina hian thuziak leh Rs. 10,000/- a kengtel a ni.


Electric man vangin mi 2 boral

Lengpui khaw mi 2- Lalmuanpuia (35) leh Lalrinkima (20) te chu nimin Pathianni chawhma dar 11:00 vel khan Sairang khaw chhunga Electric ban phun that an tumna lamah Electric hrui an hawlh fuh avangin Electric Current-in a man avangin an thi.


Ni 100 inhlawhna tur sanction

Sawrkar laipui Ministry of Rural Development chuan Mizoram tan ni za inhlawhna senso tur cheng vbc. 141.73 chuang pekchhuah phalna a rawn pe a. Sawrkar thuchhuah tarlan danin Ministry of Rural Development, Govt. of India chuan Zirtawpni khan Mizoram tan MGNREGS (Ni 100 inhlawhna) ah mipui nuai hnih (Job Card holders) te inhlawhna cheng nuai 14,173.114 a rawn sanction a. Heng sanction atang hian ST Category tan cheng nuai 14,000, SC Category tan cheng nuai 168.69 leh Other Category tan cheng nuai 4.424 hmuh a ni. He Fund sanctioned hian kumin a MGNREGS hnuai mipuite inhlawh tawhna leh inhlawh mekna tam zawk a phuhru thei dawn a ni. Heng sum te hi a changtu tur mipuite kutah, Job Card Holder te account-ah Direct Benefit Transfer in tunkar ah hian lut nghal tura beisei a ni.


CM in Bawrhsap Pisapui kang a tlawh

Zirtawpni zing-a Aizawl Bawrhsap Pisapui kang chu Inrinni khan Chief Minister Zoramthanga chuan tlawhin amah tawiawmtu Chief Secretary, Addl. Chief Secretary, Aizawl DC leh sawrkar hotulu pawimawh tak takte nen DC Office chu an enho a. PWD hotute chu uluk taka a hmunhma zirchianga, sak that theih dan turte ngaihtuaha ruahmanna siam turin a ti a ni. Chief Minister ho hian DC Office insawnna tura ruahman lailawk a lo ruahman chhin MLA Hostel chu enin Vawiin-a hawn tura ruahman tawh MINECO Multi Level Parking pawh an tlawh a, he building hi UD&PA Department sak niin GAD kuta hlan nghal tura ruahman a ni a, GAD hotute nena a hmunhma enchian hnu hian DC Office nghah lailawkna atan MINECO Multi Level Parking hi remchang zawk an ti niin sawrkar thuchhuah chuan a tarlang.


Zofate Haw Runpui Hnam Inkhawmpui Thianghlimnei

Zofate Haw Runpui Hnam Inkhawmpui Thianghlim chu December 16-18, 2021 chhung khan Zofate Pathian Biakinpui hmun, Kanan Veng Thenzawl-ah neih a ni a, thudawn danin he inkhawmpui khuallian chu ‘THLARAU THIANGHLIM’ niin thupui atan ‘I thovang u khai I din thar teh tak ang u’ tih hman niin Upa Zairemmawia Chhanchhuak leh Rev. Dr. Zaichhawna Hlawndo ten an sawi a ni.

Comments

Popular posts from this blog

Volleyball S/F khel dawn