Central Team in Serchhip District-a COVID-19 hri leng dinhmun an rawn zirchiang

Mizoram District thenkhat ah COVID-19 dinhmun ala ziaawm theihloh avanga Union Health Ministry in hri leng dona kawnga Mizoram sawrkar hmalak dan enpui tur leh puibawm tura a rawn tirh National Centre for Disease Control (NCDC), New Delhi-a Joint Director pahnih te chuan nimin khan Serchhhip District an rawn tlawh.

Sawrkar laipui tirha Mizoram-a rawn kal NCDC Joint Director Dr. Naveen Charrang leh Dr. Vinay Garg te hian tunkar tir lam khan Mizoram an rawn thlen hnuah nimin khan IDSP-a State Microbiologist, Yogesh Malm hovin Serchhip District hi an rawn tlawh a, Serchhip CMO Dr. Laldawngliana Sailo, District Medical Superintendent mawhphurhna la mektu Dr. Lalnunhlima Khiangte leh District Surveillance Officer Dr. Lalngaihawmi Chhangte te chuan lo dawngsawngin Serchhip CMO Office-ah inkawmna an nei a ni.

He hunah hian tunhnaia Serchhip District chhung khaw tina nitin-a hri kai hmuhchhuah an nih dan te COVID-19 Vaccine pekchhuah a nih dan te, hri kai enkawl dan leh CCC bakah DCHC kalpui dan te leh hmanrua an neih dan te an zawhfiah bakah an enpui a. Tunhnaia Serchhip District-a hri kai hmuhchhuah tamna khua leh Veng hrang hrang ah Sample Test uar zawka kalpui tul an tih thu sawiin, hri kai te rang zawka hmuh-chhuah leh an lo kawm hnaih te chhuiin, hri kai te pawhin rang zawka enkawlna an dawn chu a pawimawh thu an sawi a. Hetiang hian MO te kaih-hruaina hnuaiah niminpiah khan Leng-ah hmalak tan niin nimin khan Neihloh-ah pawh hmalak leh a ni a, Vawiin hian Sample Team te pawh khaw hrang hrangah kalchhuak lehin Sample enfiah hna hi ngawrh zawka thawh tum a ni bawk.

Heng Central Team te hian nimin vek khan Serchhip District Bawrhsap Kumar Abhishek pawh a Pisa-ah kawmin an thil hmuh dan te an sawipui a, Bawrhsap hnenah hian TrueNat Laboratory-ah Sample Test-na khawl tam zawk neih a nih theih nan hmalak tul an tih thu leh thawktu (Lab. Tech) te pawh neih belh tul an tih thu an sawi a. Hri kai enkawlna chungchang ah tuna DCHC atana hman mek, Trauma Centre ami chu Eye Ward-ah sawnin tuna DCHC chu Covid hri kai na zual enkawlna, ICU atan ruahman tha an tih thu te an sawi bawk a ni.