Raltlan te chungchang Parliament-ah sawichhuak

Parliament Thlasik thutkhawm neih mekah Mizoram Rajya Sabha MP K.Vanlalvena chuan Myanmar Refugee te chungchang a sawi chhuak.

Parliament thutkhawm neih mekah hian Mizoram Rajya Sabha MP chuan Myanmar Sipai ten mipuite thuneihna an chhuhsak avangin Myanmar raltlan 15,000 vel Mizoram-ah an awm mek thu sawiin, heng raltlante hi Mizoram hmun hrang hrangah awm darhin thenkhat chu an chhungkhat lainate hnena an chen thu te, a tam zawk erawh chu Mizoram sawrkar leh NGO tangkawp ten an sak Refugee Camp khaw 15 velah an chen mek thu a sawi a. Myanmar atanga raltlante te hi Mizoram sawrkar, tlawmngai pawl, Kohhran, Political Party leh mimal tin ten hmangaih takin an chhawmdawlin an mamawh chi hrang hrang chaw, tui in tur, damdawi, silhfen, chenna In leh naupang School kalna thlengin Central sawrkar tanpuina tel lovin COVID-19 hripui leng karah Mizoram in an pek thu a sawi a. India ram chu Refugee te tanpui tura intiamkam ram ni ve lo mahse khawvela democracy ram lian ber a nih avangin kan thenawm ram a Democracy duhtute tanpui hi kan tihmakmawh a nih thu a sawi a ni.