Chanchin thar thenkhat :

Lehkhabu thar tlangzarh

Mizoram Legislative Assembly Speaker Lalrinliana Sailo chuan nimin khan Mizoram Legislative Assembly Conference Hall-ah leh-khabu pahnih, Daingul-I leh Daingul-II tih te chu a tlangzarh a. Heng lehkhabu te hi Govt. Hrangbana College-a Mizo Department leh Research & Consultancy ten an buatsaih niin Daingul-I chhungah hian Rokunga Hlate zir zauna ziah a ni a; Daingul-II chhungah hian Zikpuii Pa Thu leh Hla zir zauna te a awm bawk. Mizo Academy of Letters (MAL) bultumin Poet of the Century leh Writer of the Century atan kum 2000 khan Rokunga leh Zikpuii Pa te chu thlan an lo ni tawh a ni.

RD Minister in hawng

Border Area Development Programme (BADP) 2015-2016 & 2019-2020 sum cheng nuai 42 senga sak Leithum Community Hall chu nimin khan Rural Development Minister Lalruat-kima chuan a hawng a, he Hall thar hawn tak hi a dung ft. 78 leh a vang ft. 50 niin ft. 24-a sang a ni a, BADP 2015-2016 hnuaiah cheng nuai 22 senga sak zawh tura ruahman ni mah se a hmun in a zir loh avang leh ruahman lawk aia lian-a sak a nih avangin sum hi cheng nuai 20 dil belh lehin sak zawh a ni ta a ni. Nimin vek khan RD Minister hian Samagra Shikha Project Approval Board (PAB) phalna a din Higher Secondary School chu Khuangleng-ah a hawng bawk.

PHC tan Ambulance hlan

East Tuipui bialtu MLA Ramthanmawia hmalakna a SLT Infracon Private Ltd. Silchar ten CSR hmanga an lei, Ambulance (Maruti Suzuki Eeco Van) thar chu nimin khan Farkawn PHC a hman turin East Tuipui bialtu MLA hian Medical Officer Dr. Benjamin Lalramchuana kutah a hlan a, Farkawn leh a chhehvel Zohnahthlak ten tangkai taka an hman ngei beiseiin duh-sakna a hlan bawk. He hunah hian bialtu MLA hian Farkawn PHC sak mek chu tlawhin hnathawh mek leh hmabak awmte a enfiah nghal bawk.

Mipui in harsatna tawk tih sawi

Mizoram Pradesh Congress Committee (MP-CC) hruaitute chuan nimin khan Aizawl Press Club-ah thuthar thehdarhtute kawmin Mizoram in sawrkar sawngnawi tak leh mipuite tana pa nih tlin lo tak, MNF sawrkar kan neih avangin Healthcare hnuaia damlo Bill Reimburse-ah mipuiten harsatna kan tawk nasa ta hle nia sawiin, chhungkaw sang tam tak an buai mek niin an sawi bawk.

Minister bang turin phut

ZPM Thalaite chuan Mizoram mipui ten tha taka Electric Bill an pek laia State sawrkar in NEEPCO hnenah hun rei tak a chhunluh theih tawh loh avanga Electric power kan dawn tur chhut chahah min vau chu pawi an tih thu sawiin, mipui ten Electric Bill an chhunluh hi a awmna an zawh bakah mipuite harsatna thlentu Minister chu bang tura an phut thu an sawi bawk.

AFSPA duhlohna lantir

India sipaiten Nagaland Mon Distrtict-a pawisawi lo an pawng kah avanga thi te sunna leh Armed Forces Special Power Act (AFSPA) 1958 duhlohna lantirna atan nimin khan North East Students Organisation (NESO) bultumin North East State hrang hrangah hun hman a ni a, Aizawl-ah pawh MZP Conference Hall-ah he hun hi hman a ni a. MZP hruaitute chuan he thil thleng chungchangah hian 23rd Sector Assam Rifle DIG Brig. Digvijay Singh chu a Pisa-ah hmuin, Nagaland Mon District-a thil thleng ang hi Mizoram-ah thleng ve ngai lo tura intiam turin a ngiat bawk a ni.