Chanchin thar thenkhat :

Chanchin thar thenkhat :
(22nd Dec., 2021)

Multi Level Car Parking, MINECO hawng :

Deputy Chief Minister Tawnluia chuan nimin khan Multi Level Car Parking, MINECO chu a hawng. Nimin a Multi Level Car Parking, MINECO hawnna ah hian Deputy Chief Minister chuan Multi Level Car Parking hi kan vaia tan-khawmna avanga hlawhtling a ni tih sawiin, Sawrkar hmasa in bul a lo tan tawh chu hlamchhiah mai lo in, tih puitlin nan tun sawrkar in theihtawp a chhuah a ni, a ti a. Sawrkar hmasa tih vanga hnual mai lova, thiltha a nih avanga chhunzawm a ni a, project phuailuai erawh chhunzawm theih a ni thinlo a ni, a ti bawk.

Multi-Level Car Parking, MINECO Aizawl sakna tur hi kum 2017 khan Ministry of DoNER, Govt. of India atangin sum cheng nuai 3601.00 hmuh a ni a, Contractor hi Turnkey basis-a thawk turin Open Tender kaltlanga zawn a ni a, Vikas & Associates Delhi chu thlan a ni. State Matching Share hi cheng vbc. 3.6 niin, July ni 12, 2018 khan a lung phum a ni. A tira ruahman ang chuan hnathawh hun chhung tur hi kum 2 a ni a, amaherawhchu Turnkey contract anih avangin hnathawk tura tihfel ngai tam tak a awm a, a hun takah hna hi zawh theih a ni ta lo a, hei bakah hian COVID-19 hri leng avanga harsatna avangin zawh tlai a ni bawk.

Multi-Level Car Parking hi Mizoram-a Motor dahna atana siam tawh zinga lian ber leh dawng hlawk ber a ni dawn a. Light Motor Vehicle 354 leh Two Wheeler 224 leng tura sak a ni. Floor inkalpawhna atan hian Stair Case leh Motorable Ramp (6 meter a zau) bakah Lift dah tel a ni a. Hei bakah hian he building leh Secretariat building ke a kalpawhna atan Pedestrian Steel Bridge siam tel a ni bawk.

Multi-Level Car Parking hi sak zawh a lo nih takah chuan Sawrkar in a enkawltu tura a ruat General Administration Department (GAD) Govt. of Mizoram kutah hlan a ni nghal a. Secretariat leh a chhehvela Office hrang hrang dawr tute leh a thawktute tangkai taka hman a nih ngei beisei a ni.


NHIDCL hnathawk Governor hrilhfiah :

National Highways Infrastructure Development Corporation Limited (NHIDCL) in Mizoram chhunga lamlian (National Highway) an sial mek te dinhmun leh hma an lak chin te chu nimin khan NHIDCL Executive Director Virendra Kumar Jakhar chuan Raj Bhawan-ah Larsap Hari Babu Kambhampati a hrilh a. Virendra Kumar Jakhar chuan Mizoram-a NHIDCL in hna an thawh leh an buapui mek, Aizawl to Tuipang Road, Aizawl to Champhai Road , Sairang to Vairengte 4-Lane Road leh Aizawl By-Pass Road te dinhmun leh hna an thawh chin te chu a lem nen Larsap a hrilhfiah a. Heng lamlian sial mek hmun thenkhat a harsatna an neih dan te pawh sawilangin, heng te hi a rang thei ang bera chinfel thuai a tul thu leh heng kawng te hi Mizoram hmasawnna atana a pawimawh dan te Larsap a hrilh a. Larsap chuan heng harsatna te chinfel vat a nih theih nan State Sawr-kar in a tul anga lo en a, hma lak dan tur thuneitute sawipui a tum tih a hrilh a ni.

NHIDCL in an tarlan danin Mizoram a lamlian (National Highway) KM 784 a thui enkawl, chei that leh sial mek an nei a. Heng zingah hian Aizawl to Tuipang Road KM 397 a thui te, Seling to Dulte Road KM 69 a thui te, Dulte to Cham-phai Road KM 68 a thui te laihzauh hna an kalpui mek a. Keifang - Tuivai Road KM 84 a thui leh Sairang - Vairengte KM 91-a thui sial leh laihzauh hna pawh tan vat an beisei a. Aizawl hel tur kawngpui Aizawl By-Pass, KM 39-a thui chu ruahmanna a kal mek thu leh hei hi National Highway-ah erawh puan a la ni lo thung.


Zoram mipui rin ngam tur Sawrkar tha siam tum :

MPCC President thar Lalsawta chuan Zoram mipui rin ngam tur Sawrkar tha siam an tum tih a sawi. Nimin khan Mizoram Pradesh Congress Committee (MPCC) Office Bearers thar te chuan Aizawl-a Congress Bhavan President Room-ah thuthar thehdarhtute kawmin he hunah hian MPCC President Lalsawta chuan he thu hi a sawi a, “Hmathlir thui leh hmathlir mumal tak kan nei ang a, Sawrkar tibuai thintu Corruption a awm loh nan a ler atangin mipui entawn tlak Sawrkar siam kan tum a ni. A dikah chuan nghet taka ding tur Sawrkar huaisen siam kan tum bawk ang. Ram mipuite tan that awlsamna leh sual harsatna Sawrkar, ‘That loh theihlohna Bawm’ kan siam ang,” a ti.

Mahni-a dingchhuak thei lo, retheite pual bik tan an dinchhuah ve na tur an ruahman tur thu pawh sawiin, “A ngaihna hria, Entrepreneurs leh mi taima leh rinawmte tan Sawrkarin remchanna siamin ‘Tang puihna’ kan buatsaih bawk ang,” a ti a, “District Hospital te hi thuamthat kan tum ang a. Hetih rual hian damloh vanga Zoram pawn kan pan chhan ang Damdawi In lian leh rin tlak hi Company leh mimal rin ngamte nen Mizoram-ah din kan tum bawk ang,” a ti bawk.

MPCC hruaitu thar te hian nimin vek khan tun thla ni 17-a kangral ta Aizawl DC Office chu tlawhin, Kangmei chhuak chu pawi an tih thu leh a kan chhan leh mawhphurtute rang taka sawrkar in a chhuichhuah an duh thu an sawi bawk.

Comments

Popular posts from this blog

Volleyball S/F khel dawn