Sialsir khua ah hri kai 58 hmuin Hmun khuahkhirh bik-ah puan nghal a ni

Nimin khan Serchhip District-ah COVID-19 hri kai mi 73 zet hmuhchhuah niin an zinga 58 te chu Sialsir khua an ni.

Tunhnaiah Serchhip District a Sialsir khua ah hri kai hmuhchhuah an nih avangin nimin khan Sample enfiah hna thawh leh niin hri kai mi 58 zet hmuhchhuah belh leh an ni a, hetianga hri kai hmuhchhuah an tam avang hian Serchhip District Bawrhsap chuan nizan dar 9:00 atang khan Sial-sir khua hi hmun khuahkhirh bik (Restricted Area) ah a puang nghal a ni. Nimin vek khan Serchhip khua ah hri kai mi 3 hmuh niin Serchhip-ah hian Rawpui khaw mi hri kai 4 hmuh an ni bawk a, Thenzawl leh Keitum-ah hri kai pahnih ve ve hmuin East Lungdar khua ah hri kai pakhat hmuh a ni a. TrueNat Laboratory atangin hri kai mi 3 hmuh an ni bawk.

Nimin khan Serchhip District-ah hri kai mi 3 te enkawl dam an ni ve leh a, heti hian nizan thlenga Serchhip District-a hri kai hmuh tawh chu 5931 niin an zinga 5725 te enkawl dam an ni tawh a, hri kai hmuh atanga za zela 96.52 te enkawl dam an ni tawh a, hri kai enkawllai mi 187 la awmin hri kai zingah mi 19 an boral tawh a ni.

Niminpiah khan Mizoram-ah hri kai mi 202 hmuh belh leh niin nimin khan mi 155 enkawl dam an ni leh bawk a. Heti hian nimin tlai thlenga Mizoram a hri kai hmuhchhuah tawh chu 1,41,157 niin an zinga 1,39,200 te chu enkawl dam an ni tawh a, hri kai te zinga za zela 98.61 te enkawl dam ni tawhin hri kai enkawllai 1415 an awm a, mi 542 an boral tawh a ni.