Serchhip Chanchinthar thenkhat :

Serchhip Chanchinthar thenkhat :
(Dec. 29, 2021) 

Sawrkar Pisa hawng leh tan :

Kristian te hunpui, Krismas hmanga sawrkar Pisa hrang hrang te khar a nih hnuah nimin atang khan sawrkar Pisa te hi hawn leh tan a ni a, Mizoram sawr-kar chuan December 27 kha Krismas chawlh-ah a puang a ni. Nimin khan sawrkar Pisa tam ber te chu hawn ni mah se Pisa kai erawh an tam lutuk lo niin a lang a, mipui lam pawh dawr tura kal an awm mang lo bawk nia thudawn a ni. Sawrkar Pisa hrang hrang te hi kumin atan naktuk, December 30, 2021 thleng hawn tur a ni dawn a ni.


Halpuah leh Halmawi khapna chhuah thar :

Serchhip District Magistrate Kumar Abhi-shek IAS chuan halpuah leh halmawi chungchang ah khapna thupek thar a tichhuak. Hemi chungchang a tun thla ni 27-a thupek a tihchhuah ah Serchhip District Magistrate chuan Halpuah leh halmawi te hian nasa takin mihring hriselna a tichhe theiin, boruak a tihchhiat leh tih bawlhhlawh mai bakah ri bengchheng a siam a, silai lem a mu nei chite hian mihring pian-sualna a thlen tak fo bakah tul lova sum khawhralna a ni bawk tih a tarlang a. Tunlaiah COVID-19 hripui leng avangin hetiang halpuah leh halmawi halte hian boruak a ti bawlhhlawh in mihring hriselna atan thil pawi a thlen thei tih pawh tarlangin, Serchhip District mipuiten hriselna tha tak kan lo neih theih nan leh sum leh pai tam tak kan khawhral loh nan heng hunpui kan neih - Krismas leh Kumthar hlim tlang tak leh thlamuang taka kan hman theih nan khapna thupek chhuah tula a hriat thu a tarlang a.

Hei vang hian Section 144 CrPC, 1973-in thuneihna a pek angin Halpuah, halmawi, Sky lantern leh puakthei thildang, boruak thalo siam thei leh ri bengchheng siam thei chi reng reng lakluh, zawrh, hralh, hal leh hman khap tlat a ni tih tarlangin, Naupang silai lem a mu hmang chi reng reng lakluh, zawrh leh hralh khap tlat a ni tih a tarlang a. He thupek hi thu leh awm hma chu puan a nih (27th December, 2021) atanga thla hnih (2) chhung huam tur a nih thu a tarlang bawk.

Serchhip District Magistrate hian October 27, 2021 khan hetiang thupek hi thla hnih chhung atan a lo tichhuak tawh a, hei hi Police te pawhin bawhzuiin he thupek huamchin a zawh dawn tak avangin tun tumah hian thupek thar hi tihchhuah leh a ni.


YMA hruaitu thlanna neih chhoh mek a ni :

Serchhip khawpui chhunga YMA Branch hrang hrangte chuan kumthar (2022) atana an hruaitu tur thlanna an nei chho mek a, nimin leh nizan lamah Branch thenkhat te chuan hruaitu thlanna hi neiin Vawiin leh naktuk lam thlenga hruaitu thlanna nei tur te an awm a, Branch tam ber te chuan Krismas leh kumthar inkarah hruaitu thlanna hi an nei dawn a, kumthar lama inthlang tur tlem an awm bawk a ni.


Hri kai 5822 hmuhchhuah an ni tawh :

Nimin thleng khan Serchhip District-ah CO-VID-19 hri kai mi 5822 hmuhchhuah an ni tawh. Kris-mas vuakvet-ah Serchhip District-a Sample enfiahna Booth te khar ni mah se sample enfiah leh hri kai hmuh erawh an awm reng a, Krismas ni (Dec. 25) khan hri kai mi 7 hmuh niin Chhiahtlang 3, Thenzawl 2 leh Chhingchhip leh Serchhip-ah pakhat ve ve an ni a. December 26-ah hri kai mi 5 hmuh leh ni bawkin Chhingchhip khua ah 3 leh Keitum khua ah mi 2 te an ni a. Niminpiah khan hri kai mi 15 lai hmuh leh ni bawkin an zinga 11 te chu Chhiahtlang khua an ni a, Serchhip khua ah mi 3 leh Thenzawl khua ah hri kai mi pakhat hmuh an ni bawk. Nimin atang khan Sample enfiahna te hawn tan leh niin hri kai mi 25 zet hmuhchhuah belh an awm ve leh nghal a, Serchhip-ah hri kai mi 4 hmuh niin Chhingchhip-ah 9, Chhiah-tlang-ah 6 leh Thenzawl leh Sialsir khua ah hri kai mi 3 ve ve hmuh an ni bawk.

Serchhip District-ah hian hri kai enkawl dam pawh an awm belh ve zel a, Dec. 25 khan mi 28 te enkawl dam niin Dec. 26-ah mi 35, Dec. 27-ah 7 leh nimin (Dec. 28)-ah mi 20 enkawl dam an ni ve leh bawk a ni. Heti hian nimin tlai thleng khan Serchhip District-a hri kai hmuhchhuah chu 5847 niin an zinga 5720 te chu enkawl dam an ni tawh a, hri kai hmuh tawh atanga chhutin za zela 97.82 te chu enkawl dam an ni tawh a, hri kai enkawllai 108 la awmin hri kai zingah mi 19 an boral tawh a ni.

Mizoram pumah hri kai enkawllai mi 1276 an la awm mek thung a, tunhnaiah nasa taka hri kai enkawllai zat tlahniamin nimin khan mi 157 te enkawl dam an ni leh a, heti hian Mizoram-a hri kai hmuh tawh chu 1,40,748 niin an zinga 1,38,931 te enkawl dam an ni tawh a, hri kai hmuh atangin za zela 98.71 te enkawl dam ni tawhin hri kai enkawllai 1276 an la awm a, hri kai zingah mi 541 an boral tawh a ni.


Bypass Road-ah lung lak khap :

Serchhip By-pass road ah lunglak khapna thupek tihchhuah a ni. Hemi chungchanga Serchhip District Magistrate Kumar Abhishek-a’n thupek a tihchhuah danin Serchhip By-pass road (Package-1) Chainage KM 4+200 to KM 4+260 (New Serchhip South VC area) inkarah quarry ah lung lak thin a ni a, he quarry hi Bypass kawng atanga hnuailam meter 6-a awm niin lung hal leh lung lak hian Bypass kawng a tichhe thei dawn a, hei vang hian CrPC 1973 (Act II of 1974) Section 144-in thuneihna a pek angin Serchhip Bypass road Chainage KM 4+200 to KM 4+260 (New Serchhip South VC area) chhungah lung lak leh hal khap tlat a ni tih a tarlang a ni.

He thupek hian thu leh awm hma chu Order chhuah anih atanga thla 2 (hnih) chhung huam tur niin thupek zawm lo chu Section 188 IPC dan hmangin hrem theih an ni ang.


Restricted Area-a puanna hlip :

Serchhip District chhunga Leng khua ah tun-hnaia COVID-19 hri kai hmuhchhuah nasa taka an pun avanga December 2, 2021 atanga Leng khua chu Restricted Area-a puan a nih hnuah Leng khuaah Contact Tracing tihzawh tawh a nih avang leh CO-VID-19 natna kaite an dam tak avangin Leng khua Restricted Area-a lo puan tawh chu tun thla ni 23 khan hlih a ni.

Comments

Popular posts from this blog

Volleyball S/F khel dawn