Latest News

Serchhip District-ah Lok Sabha Inthlanpui atana inbuatsaihna kal mek thlirho a ni

Image
Lok Sabha Inthlanpui neih tur atan Serchhip District-ah inbuatsaihna kalpui mek a ni a, he Inthlanpui neih tur atana inbuatsaihna hrang hrangte thlir hian nimin khan Serchhip-ah District Election Offficer leh Bawrhsap David Lalthantluanga hovin Nodal Officer te chu an thukhawm a ni.

Aizawl District Bawrhsap Pisapui kangin Magisterial Inquiry lak a ni dawn

Aizawl District Bawrhsap Pisa chu nimin zing khawvar hma khan kangin sawrkar bungrua leh lehkha pawimawh chi hrang hrang tam tham tak a kangral a, Aizawl Bawrhsap Pisapui kang chhui chiang turin Magisterial Inquiry lak a ni dawn a ni.

Kum 131-a upa Aizawl Bawrhsap Pisapui hi nimin zing dar 3:15 vel khan a kang tih hriatchhuah a ni a, kangmei hi Election Branch atanga chhuak niin zing dar 4:10-ah Fire & Emergency Services hriattir an ni a, an hriat veleh a hmun thleng nghalin theihtawp chhuahin kang thelh hna an thawk a, kangmei a nasat tawh avangin Aizawl Bawrhsap Pisapui-a Branch pawimawh zawng zawng deuhthaw chu bungrua chuh hman lohin a kangral a, Garage-a Pool Vehicle an dahte pawh kangchhia in, kang chhe zingah hian Election Branch, Planning Branch, Arms Branch, ILP Branch, Census Branch, Establishment, Nazir, DC Office Chamber, Addl. DC Office Chamber pahnih leh SDO (Sadar) Office Chamber te a tel a, Strong Room erawh a kangchhe zingah a tel lo a ni.

Kangmei chhuahna hmun hi DM&R Minister Lalchamliana, I&PR Minister Lalruatkima, Tourism Minister Robert Romawia Royte, Deputy Speaker Er. Lalrinawma, Chief Secretary Dr. Renu Sharma leh sawrkar hotu pawimawhte chuan pan nghalin thil awmzia an enthlithlai hnuah Aizawl SP Office-ah an thukhawm nghal a. DM&R Minister chuan Zoram rohlu, Aizawl Bawrhsap Pisapui, a building pawh sap ho kutchhuak la tha tak mai, INTACH hovin Heritage building-a an puan a kang chhe ta mai chu a pawi takzet a ni tih sawiin, District Emergency Centre leh hmar lama Office Building thenkhat erawh hum theih a nih thu a sawi a. Bawrhsap Pisapui kan chhan chhui turin Magisterial Inquiry lak a nih tur thu sawiin, Bawrhsap Pisa chu hna pawimawh tak tak khawihtu an nih avangin rang taka an lo insuanluh lailawk dan tur an ngaihtuah tih leh, Khatla-a Old MLA Hostel-ah engemaw chen chu an insuan lut dawn tih a sawi bawk.

Aizawl DC Office hi Old MLA Hostel, Khatla-ah suan lailawk tur a nih avangin nimin vek khan Chief Secretary Renu Sharma hovin Office kalpui zui dan tur hi sawiho nghal a ni a, Old MLA Hostel building hi chhawng thum-a sang a ni a, Room 14 (VIP room 2, Ordinary room 12), Dining Hall leh Lounge pakhat ve ve a awm a ni. He vanduaina thleng avang hian tun thla ni 25 thleng chu Aizawl DC Office hi dawr theih a ni dawn lo bawk a ni.

Aizawl Pisapui hi kum 1890 khan hawn tan niin North Lushai Hills area-a Office hmasa ber a nih avangin Mizo chanchin (history) nen thuk takin a inkungkaih a, Office building hi State Heritage Building-ah puan ni tawhin Sap ho sulhnu mai bakah hmanlai Mizo lalte chanchin, Chhiarpui, Electoral Roll leh Record hlu dang tam tak dahthatna hmun a ni a. Record pawimawh thenkhat hi Mizoram State Archive Office lamah dah ni tawh mah se, record hlu tak tak engemaw zat Pisapui-ah hian vawnthat a ni. Kum 1994 vel khan Aizawl DC Office Judicial Branch leh Malkhana te chu a lo kang tawh bawk a ni.

Comments

Popular News (Last 30 Days)