Serchhip damdawi In-a thil thleng chungchang ah Health Deptt. hotute leh MGDA ten Serchhip an tlawh

Tunhnaia Serchhip District Hospital-a thil thleng, mi 3 boralna chungchangah Mizoram sawrkar-a Health & Family Welfare Board Vice Chairman Dr. Thiamsanga MLA leh Health Secretary bakah Mizoram Govt. Doctor Association (MGDA) hruaitute chuan nimin khan Serchhip-a tlawmngai pawl leh thuthar thehdarhtute an kawm.

Serchhip District Hospital-a thil thleng chungchanga Serchhip rawn tlawhtu Health & Family Welfare Board Vice Chairman Dr. ZR. Thiamsanga MLA leh Health Secretary R. Lalramnghaka IAS te hian nimin tlai khan Serchhip District Hospital Eye Ward building-ah NGO Coordination Committee-a tel pawl hrang hrang, Serchhip Thalai Pawl leh MJA Serchhip District Member te kawmin MGDA hruaitute hian hemi hmalam hian heng pawl hrang hrangte hi an kawm bawk a ni.

Nimin-a pawl hrang hrangte an kawmna ah he huna tel Pawl hrang hrangte chuan tunhnaia Serchhip damdawi In-a thil thleng chungchang an hmuh dan leh he thil lo thlen chhan nia an hriat bakah a chinfel dan kawng nia an hriat te tlang takin an sawi hmasa a. Hemi hnu hian Dr. ZR. Thiamsanga chuan chanchin duhawm lo tak mai an lo hria tih sawiin, amah pawh Serchhip Makpa a nih avangin tuna kalkhawm ten an sawi loh tam tak pawh a lo hriat thu a sawi a. He huna tel pawl hrang hrang te thu sawi chu an chhinchhiah vek thu leh an thu sawi te pawh a inang deuh vek tih sawiin, sawrkar lam pawhin Departmental mai ni lovin Magisterial Inquiry lain a rawn chhui dawn tih a sawi bawk.

Dr. ZR. Thiamsanga chuan kum 30 zet Doctor hna a lo thawh ve tawh thu sawiin, hetiang thil hi vanduai thil thu ah pawh tu chungah pawh thleng thei a ni tih sawiin, tun tum ami pawh hi duh vanga thleng nia a lan loh thu a sawi a. Doctor ten damlo te enkawl dan a pawimawh thu pawh sawiin, “Mi te hian kan hmel ah, keimahni ah hian damna hmu rawh se,” tiin chu chu a pawimawh thu leh anmahni lam pawh an lo inenfiah tur thu bakah thurawn te pawh pe turin a ti a. Thil kal tawh chu thil danglam theih a ni tawhlo tih sawiin, “A pawimawh berah chuan thawhhona tha tak nen he damdawi In hi nakin zelah pawh mi’n an pan-a an rin ngamna turin kan thawk tlang tur a ni. He Damdawi In hmasawnna atan hian i thawk tlang ang u,” tiin Serchhip khua chu sawrkar in a ngaihthah dawnloh thu a sawi bawk.

He hunah hian Health Secretary R. Lal-ramnghaka pawhin Serchhip damdawi In chu pantu an tam tih sawiin, District dang thenkhat te nen pawh inang tlang-a en tur a lo ni reng reng lo tih te pawh rilru-ah a awm thu a sawi a, tuna Serchhip damdawi In thawmthat chungchang ah pawh ngaihtuahna thar an neih a rin thu leh theihtawp erawh an chhuah tur thu a sawi a. Hospital ram sawn chungchang pawh he hunah hian sawihona neiin bawhzui dan tur sawilan a ni bawk.

Nimin a he inkawmna neih a nih hma hian Mizoram Govenment Doctor Association te chuan helai hmunah bawk hian heng NGO hrang hrang te leh MJA member te hi an kawm bawk a, he hi hi MGDA President Dr. Chawngthanchhunga chuan kaihruaiin tun tuma ah rawn kal hian thu sawi vak tura rawn kal an ni lo tih sawiin, mipui rawngbawltu an nih angin mipui thatna tur an duh thu a sawi a, khawtlang nen kan thawhho that a pawimawh thu a sawi bawk.

He hunah hian MGDA Vice President Dr. C. Lalhrekima pawhin Serchhip-a Doctor te an kawm tawh thu sawiin, harsatna an tawh te pawh an ngaihthlak sak thu leh zilh an ngaihna ah pawh an lo zilh tur thu a sawi a. Serchhip khua chu Doctor, a bik takin Specialist a neih that avanga an vanneih thu sawiin, thawktu te pawhin nuam ti taka hna an thawh theihna turin boruak tha siam a pawimawh thu te a sawi bawk a ni.