Vaphai-ah Tui lakna hawng

Cheng nuai 270 senga Ni zung chakna hmanga tui lakna tur, Mausang Solar Water Pump System chu nimin khan RD Minister Lalruatkima chuan Vaphai-ah a hawng.

Ministry of Home Affairs hnuaia Border Area Development Programme (BADP) Additional Fund 2019-2020 hmanga he tui lakna hawnna hunah hian RD Minister chuan Vaphai khua in Nizung tha chakna hmanga tui pump chhuahna, Mausang Solar Water Pump System tha tak a nei thar chu a lawmpui thu sawiin, nitin mamawh tui hnianghnar zawka an dawn theih nana tangkai taka an hman ngei a beisei thu a sawi a. Sawrkarin mirethei zawk ten leirem an rah theihna turin theihtawp a chhuak mek zel tih sawiin, kum thar lamah Sawrkar Flagship Prog-ramme SEDP kalpui tum a ni, a ti bawk.

Mausang Solar Water Pump hi March ni 13, 2021 khan thawh tan niin, June ni 18, 2021 khan zawhfel a ni a. He hna hi Rb.H General Enterprise, Dawrpui, Aizawl ten thawkin hawn a nih atanga kum 5 thleng a enkawlzui hna an thawk dawn a ni.

He hna hian Work Component 9 keng telin a panna kawng KM 2 vela thui, Sedimentation Tank, Horizontal Roughing Filter, Control Room/Pump House (RCC), Clear Water Sump pahnih, tuilakna pipe metre 1860 a thui bakah, Electro-Mechanical Component stage pahnihte leh a hungna te a tel a. Tui pump chhuahna hmun Stage 1 atanga Stage 2 kaltlanga khaw lu a Water Reservoir thleng tuilakna pipe thui zawng hi metre 1860 a ni a, tui pump tan tirhna leh khaw lu-a tui dahkhawlna (Water Reservoir) in san hleihna hi metre 405 vel niin, nikhat-a tui litre 1,92,000 pump chhuak thei tura duan a ni.

Nimin-a he hun hman hi bialtu MLA leh Bamboo Link Road Board Vice Chairman Ramthanmawia pawhin a hmanpui a, RD Minister hian Samthang khua pawh tlawhin Samthang khaw tan tui dahkhawlna (Water Reservoir) siam a nih tur thu a hrilh bawk a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man