Chanchin lawrkhawm :

Kuhvarah-ah YMA in hma la

Central YMA chuan nimin khan thuchhuah siamin Dan lova kuhvarah sumdawnna kalpui mekah  YMA Hruaitute leh Member te inhnam-hnawih lo turin an ngen a, Dan lova sumdawnna kalpui mek hi tihtawp thuai a nih theih nan thu-neitute tangruala hma la thuai tura an ngen bakah Mizo hnam nun dan tha tichhe theitu leh tichhe mektu he sumdawnna hi tihtawp a nih theih nan hmalak chhunzawm zel CEC chuan a remti tih an sawi a. Hemi kawnga Champhai DC hma-lakna an thlawp thu sawiin, he sumdawnna zir-chiang turin Committee an din bawk.

CADC Chairman ah thlang

Chakma Autonomous District Council (CA-DC) Chairman atan Buddha Lila Chakma chu chuhtu awmlova thlantlin a ni. Nimin khan CADC Session neih neih a ni a, he hunah hian Deputy Chairman Lakhi Dhan Chakma chuan CADC Chairman atan Buddha Lila Chakma chu chuhtu awm lovin tlingah a puang a, December ni 23 khan Chairman chuh theihna hun hawn tan niin hming pelut awmchhun niin, November ni 22-a Chairman atanga bang ta Mohan Chakma a thlak ta a ni. Buddha Lila Chakma hi Vaseitlang MDC Constituency atanga thlantlin niin, CEM leh Executive Member te pawh lo ni tawh a ni.

Aadhar Card-ah hma la mek

Unique Identification Authority of India hmalakna in Aadhar Card neilo zawng zawngin an neih theih nan hmalak mek a ni a, Mizoram-ah pawh mipui zawng zawngin Aadhaar Card an neih vek theih nan Special Camp neih mek a ni. Aadhar Card nei lo te, chhan hrang hrang avanga Aadhar Card siamthat ngai te chuan internet-ah Aadhar Card Enrolment Centre-ah luh tur a ni a, appointments.uidai.gov.in ah kum 15 tling chin te, kutzia siamthat ngai te, thlalak siamthat ngaite leh mitmu thla lak ngai te tan siamthat theih vek a ni. He internet link-ah hian Aadhar siam ngaite tana tih tur a kawhhmuh vek a, Mizoram pum tan a tih theih a ni.

Heritage Walk buatsaih

Tourism Department chuan nimin khan ‘Winter Festival 2021’ pualin Ke-a in kalsiak, Heritage Walk an buatsaih a, Tourism Minister Robert Romawia Royte chuan Ngaizela Petrol Pump atanga vailiamin Lungleng Lal In thleng, KM 18.2-a thui chu ke-in mi 217 te an kal a ni. Tourism Department chuan Ministry of Tourism atanga kumtin kut huaihawtna tur sum a hmuh thin hmangin Winter Festival a huaihawt thin a, kumin pawh hian hrileng karah he hun hi hman niin kawng hrang hrangah inelna buatsaih a ni.

Mizoram-ah Omicron la hmulo

Tunhnaia India ram pawn atanga Mizo-ram-a haw zinga COVID-19 vei hmuhchhuah mi pahnih chu Kolkata-ah an Sample enfiah nawn a nih hnuah COVID-19 chi thar Omicron a ni lo tih finfiah a ni a, tun thlengin Mi-zoram-ah hian Omicron kai hi an la awmlo nia hriat a ni. Hetihlai hian India ramah Omicron kai mi 781 hmuhchhuah an ni tawh a, an zinga 241 te chu enkawl dam an ni tawh thung a, Omicron case tamna ber Delhi-ah 238 awmin Maharashtra-ah 169 a awm bawk a ni.