Latest News

Serchhip District-ah Lok Sabha Inthlanpui atana inbuatsaihna kal mek thlirho a ni

Image
Lok Sabha Inthlanpui neih tur atan Serchhip District-ah inbuatsaihna kalpui mek a ni a, he Inthlanpui neih tur atana inbuatsaihna hrang hrangte thlir hian nimin khan Serchhip-ah District Election Offficer leh Bawrhsap David Lalthantluanga hovin Nodal Officer te chu an thukhawm a ni.

Serchhip thuthar thenkhat :

Serchhip thuthar thenkhat :
(December 22nd, 2021)

Govt. H/S Headmaster exam result chhuak :

Mizoram Public Service Commission (MP-SC) chuan Govt. High School Headmaster Post ruak 49 hnawhkhahna tura Limited Departmental Exam a buatsaih result chu nimin khan a tichhuak ta. Tun tuma MPSC in Govt. High School Headmaster Post ruak 49 hnawhkhahna tura Limited Departmental Exam a buatsaih hi Nov. 1 - 5, 2021 chhung khan neih niin Candidate 40 awmin an vai hian an Exam tluan a, nimin khan result tih-chhuah niin an zinga mi 36 te chu Govt. High School Headmaster-a kaisang turin an tling a ni.

Tun tumah hian Serchhip District atangin mi 2 an tling a, heng mite hi David Laldintluanga, New Serchhip Venglai, tuna Govt. H/S Serchhip-a thawk mek leh C. Lalrammuana, Serchhip Field Veng, tuna Govt. JM H/S-a thawklai te an ni.


ASF hri lenna ah Vawk pakhat thi leh :

Serchhip District-a African Swine Fever (ASF) hri lenna hmuna la puan, Serchhip Kawnpui ah niminpiah khan Vawk thi pakhat a awm belh leh a, hei hi enfiah nghal niin ASF hri erawh a kai lo nia thudawn a ni thung a, ASF hri lenna khua ah chawlhkar khat hnua Vawk thi leh hmasa ber a ni. Heti hian Serchhip District-a ASF hri lenna khaw 35-a Vawk thi chu 3893 an tling tawh a, Vawk 3040 suat a ni tawh bawk a ni.


Mizoram Team-ah Hmeichhia pakhat tel :

Volleyball Federation of India (VFI) in Dec. 25th-30th, 2021-a Burdwan, West Bengal-a National Junior Volleyball Championship a buatsaih turah Mizoram Volleyball Association (MVA) chu Mipa leh Hmeichhe Team tir turin a inbuatsaih mek a. Mipa Team-ah Serchhip District mi an tel loh laiin Hmeichhe Team-ah Malsawmzeli, Darnam Veng chu telin Aizawl-ah Camp an nei mek a, naktuk ah Mizoram an chhuahsan ang.


MJA in chhungkaw 6 te tanpui :

Mizoram Journalist Association (MJA) Serchhip District chuan Inrinni kalta a Advance Krismas an hman tuma an member ten Krismas Charity Fund an thawhkhawm chu nimin khan sem-chhuakin tun tumah hian Serchhip Town chhunga chhungkaw 6 te hnenah Rs. 2000/- theuha semin a vaiin Rs. 12,000/- semchhuah a ni.

Serchhip District-ah hri kai 173 enkawl mek :

Serchhip District-ah COVID-19 hri kai enkawllai tlem zelin nimin tlai khan hri kai enkawllai mi 173 an awm. Nimin khan Serchhip District-a COVID-19 hri kai te zingah mi 25 te chu anmahni enkawlna hmun atanga chhuahtir an ni ve leh a, heti hian nimin tlai thlenga hri kai enkawl dam chu 5566 an tling tawh a ni.

Nimin khan Serchhip District-ah hri kai mi 16 hmuhchhuah thar an awm thung a, an zinga mi 3 te chu TrueNat Laboratory atanga hri kai hmuh te niin an vaiin Serchhip a mi vek an ni a. Rapid Antigen Test hmangin nimin khan hri kai mi 13 hmuh awm bawkin an zinga 8 te chu Chhingchhip khua ami an ni a, Chhiahtlang-ah hri kai mi 3 leh Khawlailung-ah hri kai mi 2 hmuh an ni bawk.

Heti hian nimin tlai thlenga Serchhip District-a COVID-19 hri kai hmuhchhuah tawh chu 5757 niin an zinga 5566 te chu enkawl dam an ni tawh a, hri kai hmuhchhuah atangin za zela 96.68 te enkawl dam ni tawhin hri kai enkawllai 173 an la awm a, hri kai zingah mi 18 an boral tawh bawk a ni.

Mizoram-ah niminpiah khan hri kai mi 217 hmuh belh leh niin nimin khan mi 220 enkawl dam an ni thung a, heti hian nimin tlai thlenga Mizoram-a hri kai hmuhchhuah tawh chu 1,39,705 niin an zinga 1,37,532 te chu enkawl dam an ni tawh a, hri kai zinga za zeal 98.44 te enkawl dam ni tawhin hri kai enkawllai 1649 an la awm a, hri kai zingah mi 533 an boral tawh a, nimin-a hri kai boral awm belh lovin tun thla ni 17 hnuah mi 3 boral an awm tawh a ni.

Comments

Popular News (Last 30 Days)