Sawrkar hnathawk in sawrkar policy sawisel pawi ti

Home Minister Lalchamliana chuan sawrkar hnathawk zingah Social Media hmanga sawrkar Policy sawisel an awm thin chu pawi a tih thu a sawi.

Mizoram Secretariat Service Association (MSSA) General Conference vawi 16-na nimin-a AATI Auditorium, Aizawl-a neih a hmanpuina ah he thu hi sawiin Home Minister chuan MSSA Member te chu sawrkar hnathawk tih inhre reng a, tu pawhin sawrkarna changse ‘neutrality’ vawng reng turin a chah a. Sawrkar hnathawk zingah Social Media hmanga sawrkar policy sawisel an awm thin chu pawi a tih thu leh, Service Conduct Rules pawhin tih loh tur a tih zingah a telh tih hre reng a, India Danpui in Fundamental Rights a sawi zinga Freedom of Expression hmang thiama, fimkhur zual turin sawrkar hnathawk zawng zawngte a chah a ni.

Home Minister chuan Mizoram Secretariat Service Association (MSSA) hnathawkte chu Sawrkar inrelbawlna hrang hrang – Secretariat, Department-ah te leh District-ah mi pawimawh tak an ni tih sawiin, sawrkar File noting ziaktu pawimawh leh hotute thurawn pe tu an ni tih a sawi a, Sawrkar hna chu hlawh lakna atan chauha ngai lova an thawh chhan ber mipui tana rawngbawl ani tih chu hre reng turin a chah a. Khawpui mite leh thingtlang lam atanga anmahni dawr tura lokal te chu dimdawi a, tha taka lo dawngsawng a, Mizoram mipuite rawngbawl sak zel turin a ngen bawk a ni.