Chanchin thar thenkhat :

Tribal Art & Craft Festival

Social Welfare & Tribal Affairs Department changtu Minister Dr. K. Beichhua chuan nimin khan ni 4 awh tur ‘Tribal Art & Craft Festival’ chu Mc Cabe Hall, Aijal Club-ah a hawng. Azadi Ka Amrit Mahotsav hnuaia Social Welfare & Tribal Affairs Department in programme 11 a buatsaih tur zinga pakhat leh a bul tanna a nih thu Minister chuan sawiin, he Kutpui buatsaih mek hi hlut saka tlawh theuh turin mipuite a sawm a ni. Tribal Art & Craft Festival-ah hian lemziakthiamte, puantahtute, kuthemthiam leh kermawi lam thiam te chuan an kutchhuak chu a tlawhtute lei theih turin an phochhuak a, tun thla ni 11 thleng zing dar 10:00 leh tlai dar 4:00 inkarah tlawh theih a ni ang.

Hunpui lo thleng tur thlirho

Nimin khan Aizawl-ah District Bawrhsap Dr. Lalhriatzuali Ralte hovin Krismas leh Kum-thar vuakveta boruak muanawm neih dan tur sawihona neih niin COVID-19 Appropriate Behaviour(CAB) bakah Dan leh Thupek khauh zawka kalpui rel a ni a. He hunah hian MIMA hotute chuan mipuite khawpui-a bazar tura pun-khawm ngai lo a mahni khua theuha an mamawh te lei theih tura ruahhmanna siam an tum thu he hunah hian tarlangin, Commerce & Industries Department te chu bazar-na hmun te a darhsarh thei ang bera ruahmanna siam tur leh bazarna hmunah te CAB tha taka zawm anih theih nan mipui ah tlangau tura ruahmanna siam tura tih an ni.

Kolasib-ah Pawl Kut hmang

Nimin khan Kolasib-a I&PR Conference Hall-ah Pawl Kut hman niin Supply Minister K. Lalrinliana chuan Kut Pa niin a hmanpui a, hnam dinchhuahna leh tih hmasawnna kawngah hnam ziarang leh nun ze mawi kan neih ang ang te chu chawi nun reng a pawimawh thu sawiin, ram chhung leh pawn a kan unau zohnahtlakte nen pawh a inunauna tha leh induhsakna lantirna hun atan Mizo in-a Kut kan neihte chu hman a pawimawh thu a sawi bawk. Pawl Kut-ah hian Cultural Club 16-te an tel a ni.

MNF VC ding thar dawn

Nimin khan MNF Party chuan Vaphai Community Hall-ah mithar lawmluhna hun hmangin MNF Adviser Lalruatkima chuan Congress 94, ZPM 30 leh MPC atangin voter 1, an vaiin voter 125 te MNF-ah a lawmlut tih MNF chuan thu-chhuah siamin an tarlang a. Lawmluh zingah hian Congress VC member pahnih telin Vaphai-ah hian MNF VC a ding dawn ta tih an tarlang bawk.

Civil Aviation Minister hmu

BJP Mizoram Pradesh hruaitute chuan niminpiah khan Union Civil Aviation Minister Jyotiraditya M. Scindia chu New Delhi-a a Office-ah hmuin Mizoram dinhmuh leh mamawh te an sawipui a, Union Minister hian Mizoram-a Civil Aviation tih changtlunna tur proposal Ministry-a a rang lama thehlut tura CM thurawn lo pe turin a lo hrilh tih BJP chuan an sawi.