Enkawllai 323 la awm mek

Nizan thleng khan Serchhip District-ah COVID-19 hri kai enkawllai mi 323 an awm mek.

Serchhip District-ah COVID-19 hri kai hmuh belh an la tam viau zel a, nimin khan khaw hrang hrangah hri kai mi 37 lai hmuh belh leh an ni a, niminpiah khan Thenzawl-ah Rapid Antigen Test hmangin hri kai mi pakhat hmuh belh a ni bawk a. Heng te nen hian nimin tlai thleng khan Serchhip District-a hri kai hmuhchhuah chu mi 5646 zet an tling tawh a ni.

Nimin khan Serchhip District-ah hri kai mi 51 enkawl dam an awm belh ve leh bawk a, heng te nen hian Serchhip District-a hri kai te zingah mi 5306 te enkawl dam an ni tawh a, hri kai hmuhchhuah atanga za zela 93.97 te enkawl dam an ni tawh a, hri kai enkawllai 323 la awmin hri kai zingah mi 17 an boral tawh a ni.

Tunhnaia hri kai hmuh belh tamna Neihloh khua ah chuan nimin thleng khan Sample enfiah 209 atangin hri kai mi 90 hmuh an ni tawh a, Serchhip District-ah khaw mal-a hri kai enkawllai tamna ber a ni mek a ni.