Dr. R. Lalthangliana’n sawrkar laipui-a mi pawimawh hrang hrangte a kawm zui zel

New Delhi-a zin Minister Dr. R. Lalthangliana chuan Inrinni khan sawrkar mi pawimawh hrang hrangte kawmin Mizoram mamawh hrang hrang a thlen.

Commerce & Industries Department changtu Minister Dr. R. Lalthangliana hian MSME Secretary BB. Swain chu a pisa-ah hmuin MSME Minister Narayan Rane leh Union Finance Secretary Dr. TV. Somanathan te nen a inkawmna bawhzuia kal a nih thu a hrilh a, COVID-19 hripui vanga harsatna tawk Mizorama Micro Enterprise te chhanchhuahna tur ‘Proposal for Special Economic Package’ pawimawhzia hrilhfiahin, Nodal Ministry an nih ang ngei a lo ngai thutak tur leh a hlawhtlinna tura tan lakpui turin a chah a, MSME Secretary leh a thawhpuite chuan Minister thahnemngaihna chu a fakawm an tih thu sawiin, theihtawp an chhuah tur thu an lo hrilh a ni. Hei bakah hian Industrial Growth Centre, Luangmual, Aizawl-a mi chu a ruhrel leh thil pawimawh dang tihphuisui a pawimawh thu thlen bawkin, MSME hnuaia SFURTI Scheme thar hmanga Mizoram hmun thenkhata hmalak nghal a tul thu a thlen bawk.

Ministry of Health & Family Welfare-a Secretary Rajesh Bhusan pawh tlawhin Mizoram in COVID-19 hripui dona kawnga hma a lakna a sawipui bakah National Health Mission, Mizoram tana kum 2021-2022 chhunga hman tur tangka cheng vbc. 140 lai mai ruahman sa an rawn sanction muang lutuk chu a ngaimawh hle tih sawiin, Mizoram sawrkarin a tih ve ngai awmte nen enzuiin hmanhmawh lehzuala hmalak a nih tur thu an sawi a. COVID-19 hri kai damlote mamawh damdawi man to leh vang Tocilizumab leh Remdesivir chungchang pawh a sawipui a, Umion Health Secretary hian Mizoram in a mamawh zat an thlen chuan a lo tihfel nghal tur thu a lo hrilh a, Zoram Medical College (ZMC) tihchangtlunna tura hmalak dan tur chi hrang hrang an sawi dun bawk.

Ministry of Tribal Affairs Secretary Anil Kumar Jha pawh Dr. R. Lalthangliana hian a Pisa-ah hmuin Mizoram-a Tribal Industries Complex dinna tur chungchang leh Health Sub-Centre te thuamthatna atana hmalakna tur bakah College zirlaite awmna tur Tribal Hostel sak chungchangte bakah Ministry of Tribal Affairs kaltlanga hmalak theih thil pawimawh chi hrang hrang an sawidun bawk a. Ministry of Human Resources Development-a Official mi pawimawh pathum ten kawm bawkin RUSA hnuaia Asst. Professor te hlawh chungchanga harsatna chinfel a harsa lutuk chu a ngaimawh hle tih lo sawiin, anni chuan reiloteah chinfel theih an inbeisei tawh thu an hrilh a, Minister-in RUSA 3.0 chhunzawm thuai a tul thu a sawi pawh thla 3 hnu ah chuan kalpui hman an inbeisei tih an hrilh bawk a. Kum kalta January thla a Ministry of HRD in Mizoram University, Southern Campus, Lunglei-a din phalna notification a tihchuah tawh COVID-19 hripui leng vanga hmalak chak theih loh chungchang pawh a sawipui bawk a ni.