Serchhip Bazar-ah dawr pakhat a kang

Nizan zanlai pelh hnu khan Serchhip Bazar a Puanthuina dawr pakhat ah kangmei chhuakin kangmei nasa zawk a chhuah hmain thelh theih a ni.

Thudawn danin he dawr ‘Machhani Tailoring’ hi Apollo Building, Serchhip Bazar-a awm niin Serchhip Chhim Veng-a Lalnghenchhani ta a ni a, nizan dar 1:00 pelh hnu hret khan a kang tih hriat niin Serchhip Bazar-a Police Duty te leh helai hnaia awm ten a thelh hna thawk nghalin Fire & Emergency Services te pawh hriattir nghal an ni a, amaherawh chu F&ES te hian an lirthei chungchang ah harsatna tlem an tawh avangin he vanduaina thlenna hmun hi an thleng har deuh a, mipuite hian a theih anga an thelh hnuah kangthelhtute hi rawn thlengin bungraw tam zawk kang tur leh a thenawm In dang kangkai tur an veng thei nia thudawn a ni.

He dawr neitute hian an dawr-a puanthan engemaw zat leh thildang a kangchhe nual tih an sawi a, thil kang hlut zawng hi an la chhut mai theihloh thu sawiin, puanthan chhekkhawl lai an ngah avangin nuai tam fe man erawh a nih tur thu an sawi bawk.

He dawr kang thenawm hi North East Region Housing Finance Company Ltd. (NER-HOFIC Ltd.) Serchhip Branch chuan luahin anni erawh hi chu an bungrua a kangchhe lutuk lo nia thudawn a ni thung.