Latest News

Serchhip District-ah Lok Sabha Inthlanpui atana inbuatsaihna kal mek thlirho a ni

Image
Lok Sabha Inthlanpui neih tur atan Serchhip District-ah inbuatsaihna kalpui mek a ni a, he Inthlanpui neih tur atana inbuatsaihna hrang hrangte thlir hian nimin khan Serchhip-ah District Election Offficer leh Bawrhsap David Lalthantluanga hovin Nodal Officer te chu an thukhawm a ni.

Serchhip thuthar thenkhat :

Serchhip thuthar thenkhat :
(December 23rd, 2021)

Ni 100 inhlawhna sum rawn pechhuak tan :
Tunhnaia Rural Development Minister Lalruatkima’n sawrkar laipui hotute hnena a thlen hnuah MGNREGS hnuaia Job Card neitute tana inhlawhna tur sum chu sawrkar laipui in a rawn pechhuak mek a. Hemi chungchangah hian Serchhip BDO Lalrinchhani Ralte chuan ni 100 inhlawhna sum hi a hma lam khan September thla hmalam zawng a lut tawh tih sawiin, tunah hian thla 4 (September, October, November leh December) lut hmabak ala awm nia an ngaih thu leh tun tumah hian sum hi la rawn lut mek chauh a nih avangin sum rawn lut tur chin hi an la hriat bik loh thu a sawi a. District thenkhat ah September thla lut lova October thla atana sum rawn lut te a awm bawk si avangin tun tuma inhlawhna siam theih dan tur hi hriatchian theih ala nih loh thu a sawi bawk.

Motor lian la tlan thehloh :
Serchhip P&E Veng VC huamchhunga H. Roliana In bul (P&E Veng YMA Hall thlang) a Culvert siam a nih avanga Serchhip District Superintendent of Police Stephen Lalrinawma’n helai kawng hi December 19, 2021 thlenga lirthei tlan phalloh-a a lo puan tawh chu Culvert hi siam ni tawh mah se he culvert hi a him zawk nan leh a tlo zawk nana P&E Veng VC-in an dil ang leh Traffic-In-Charge report angin helai hmun hi Medium vehicle (407) chin chunglam tan tlan phal rih loh a ni tih Serchhip SP chuan thuchhuah siamin a tarlang a. He Order hi tun thla ni 31 thleng hman tur a ni ang.


Hri kai mi 22 hmuh belh leh an ni :
Nimin khan Serchhip District-ah COVID-19 hri kai mi 22 hmuh belh niin mi 9 enkawl dam an ni thung. Nimin khan Serchhip District-a True-Nat Laboratory atangin hri kai mi pakhat hmuh belh a ni a, hei bakah hian Rapid Antigen Test hmangin hri kai mi 21 hmuh an ni bawk a, heng zinga 8 te chu Chhiahtlang mi niin Chhingchhip-ah hri kai mi 7 hmuh an ni bawk a, Serchhip-ah hri kai mi 3 leh Khawlailung-ah hri kai mi 2 hmuh an ni bawk. Heng bakah hian niminpiah khan Thenzawl-ah hri kai hmuh belh mi pahnih an awm bawk a ni.
Nimin khan Serchhip District-a hri kai mi 9 enkawl dam an awm belh leh a, heti hian nimin tlai thleng khan Serchhip District-a hri kai hmuh tawh chu 5781 niin an zinga 5575 te chu enkawl dam an ni tawh a, hri kai hmuhchhuah tawh atanga chhut in za zela 96.43 te enkawl dam an ni tawh a, hri kai enkawllai 188 la awmin hri kai zingah mi 18 an boral tawh a ni.
Mizoram pumah niminpiah khan Sample 3936 enfiah niin hei kai mi 197 hmuhchhuah an ni a, Sample enfiah atanga za zela 5.03 ten hri an kai a. ZMC-a RT-PCR Laboratory-a Sample en 168 atangin hri kai 27 hmuh niin Fluorescent Immunoassay Test hmanga Sample 12 enfiah ah hri kai hmuh an ni lova, TrueNat Laboratory-a Sample 132 enfiah ah hri kai mi 24 hmuh niin Rapid Antigen Test hmanga Sample 3623 enfiah atangin hri kai mi 146 hmuh an ni bawk.
Nimin khan Mizoram-ah hri kai 238 enkawl dam ni lehin nimin tlai dar 5:00 thlenga hri kai hmuh tawh chu 1,39,902 niin 1,37,761 enkawl dam an ni tawh a, hri kai zinga 98.47 enkawl dam ni tawhin hri kai enkawllai 1606 an la awm a, nimin ah hri kai mi 2 boral lehin hri kai 535 an boral tawh a ni.

Comments

Popular News (Last 30 Days)