Chanchin thar thenkhat :

 Chanchin thar thenkhat :

(23rd Dec., 2021)

Mizoram COVID-19 dinhmun thlirho :

Nimin khan Health Minister Dr. R. Lalthangliana hovin SAD Conference Hall, Ai-zawl-ah Mizoram COVID-19 dinhmun thlirho a ni. He thutkhawm ah hian hian State-Level Expert Team on COVID-19 Management te chuan CO-VID-19 variant thar Omicron chungchang sawi-fiahin, khawvel ram 100 chuangah hmuhchhuah a nih tawh thu leh India ramah pawh State 10-ah case 200 chuang hmuh a nih tawh thu an sawi a, USA-a COVID-19 positive an neih mek zinga za zela 73 chu Omicron an nih thu sawiin, khaw-thlang ram te an ralkhel a, Europe ram thenkhatah chuan lockdown an puang hial a, he hrik thar hi a thawkna lo anga hriat ni rih mahse Delta variant aiin a let thum laia inkaichhawn a awl avangin a thlamuanthlak loh a, hri kai kan tam viau chuan inenkawlna hmun leh khawl ten a daih lo thei a, a hlauhawm nep tihna a ni lo a ni, an ti a. COVID Appropriate Behaviour (CAB) kan zawm that loh chuan kan dinhmun a tha lo leh viau thei tih pawh sawiin, Mizo zingah co-morbid condition (zun-thlum, thisen sang etc) nei kan tam avangin kan fimkhur a ngai takzet tih an sawi a ni.

Omicron hmuhchhuah a nih hnuah India ram pawn atanga Mizoram-a lo haw mi 139 an awm tawh thu sawiin, Lengpui Airport-ah RAgT an nih bakah sawrkarin ruahmanna a lo siam tawh angin fimkhur leh uluk taka khunghran an nih thu tarlan a ni a, rawn haw zinga mi pahnih – Singapore leh Australia atanga lo haw te RAgT positive an ni tih Lengpui Airport-ah hriatchhuah an ni a, ZMC-ah dah nghal niin an Swab Sample pawh Genomic Sequencing turin Kolkata-ah thawn a nih thu tarlan a ni a, an dinhmun a ngaih-tuahawm lova, tunkar chhungin an test result hriat a beiseiawm tih sawi a ni.

ZMC a Genomic Sequencing Laboratory ah pawh Trial Run neih a nih tawh thu leh an test result te National Institute of Virology (NIV), Pune a thawn mek a nih thu tarlan niin, phalna pek an nih hma chu Official-a Genomic sequencing tih theih a nih rih loh thu tarlan a ni bawk.

Meeting chuan kumin hunpui vuakvetah mitin fimkhur tur leh COVID Appropriate Behaviour (CAB) zawm tha turin an ngen a, Task Force Duty leh Executive Duty te thahnemngai taka thawkchhuak tura ngenin, hripui kan inkaidarh leh lohnan mi zawng zawng mahni hmun theuhah fimkhur taka khawsa turin an chah a. Vaccine lak kim vek a nih theihnan theihtawp chhuah thar leh a tul thu tarlan niin, District tinah ICU khum 5 tal dah a nih theihnan hmalak a ngaih thu te pawh he hunah hian sawi a ni bawk.

Mizoram Rel kawng-ah hmalak zui tul ti :

Mizoram Lok Sabha MP C. Lalrosanga chuan Lawngtlai District-a Hmawngbuchhuah thleng Rel kawng siamna tur atana Survey lo neih tawh anga hmalak zui zel a tul thu a sawi. Nimin a DONER Ministry Consultative Committee thutkhawmna Parliament Annexe-a neihah he thu hi sawiin Mizoram Lok Sabha MP chuan KM 223-a thui ni tura chhut Sairang atanga Hmawngbuchhuah thlenga Rel kawng siam tum hi Kolodyne Multi Modal Transit Transport Project nena inzawm zel thei tura ruahman a nih angin Mizoram tan a tangkai theih hle dawn avangin hmalak chhunzawm zui ngei nise tiin DONER hotute chu a hrilh a ni.

DONER Minister G. Kishan Reddy chuan Prime Minister thahnemngaihna in India hmar-chhak-ah Rel kawng siamna cheng vbc. 39,000 senna tur hna hrang hrang thawh mek a nih thu a sawi a. Rel kawng tur leiverh 122 verh mekah 27 verh zawh tawh a nih thu leh Motor kawngpui laih hna cheng vbc. 85, 000 chuang senna tur hmarchhak ah thawh mek a nih thu a sawi bawk.

Mizoram Lok Sabha MP C. Lalrosanga chuan Mizoram-a khualzin hip luhna tur ruangam tihchangtlun zel a tul thu leh Mau hman tangkaina dap zui zel a tul thu DONER hotute chu hrilhin, hmarchhak State-te tana Central sawrkar Ministry leh Department 54-te sum ruahman zaa 10, Gross Budgetary support atana cheng vbc. 68,000 chuang tun sawrkar kuma ruahman a ni chu lawmawm a tih thu sawi a. DONER Minister chuan he sum dah hi a tngkai thei ang bera hmanral tum a ni, a ti.

Hei bakah hian Lok Sabha MP chuan ramri hrul hmunte ngaih pawimawh a tul thu sawiin, India Telecom company-ten ramri hrul hmunah te inbiakpawhna lam an tihphuisui a tul takzet a ni, a ti bawk.

National Mathematics Day hmang :

Mizoram Science, Technology & Innovation Council (MISTIC), Directorate of Science and Technology te buatsaihin nimin khan Mizoram Rural Bank Auditorium, Aizawl-ah National Mathematics Day, 2021 lawmna neih a ni a. He hun hi Planning Department Secretary Lalmalsawma Pachau chuan hmanpuiin Mathematics pawimawh zia hre tur chuan a tum chiang taka zir a tul thu leh Competitive exam hrang hranga tling thei tura Mathematics pawimawh zia te a sawi bawk.

He hunah hian Mizoram Mathematics Society (MMS) leh MISTIC ten kumin-a Pawl 5, 8, 10 leh 12 te tana State Level Mathematics Competition an buatsaih a titha te hnenah chawi-mawina thuziak leh sumfai hlan a ni bawk.

COVID-19 vangin Minister hlui boral :

Mizoram sawrkar-a Minister hlui Hrang-thanga Colney chu COVID-19 vangin nimin zing dar 8:00 khan ZMC-ah a boral. Kum 81-a upa Hranthanga Colney hian tun thla ni 10 khan CO-VID-19 hri a kai tih hmuhchhuah niin ZMC-ah enkawl a ni a, nimin zing khan boralin natna dang nei tel a ni a, a ruang hi Aizawl Zarkawt-a an chenna In-ah lak a nih hnuah nimin vek khan vuiliam nghal a ni. Hrangthanga Colney hi kum 1993-a MLA inthlanpui-ah khan Khawbung bial atangin MJD Ticket-a thlantlin a ni a, Congress Party leh MJD hian sawrkar siamin Minister dinhmun a luah a ni. Heti hian Mizoram-ah COVID-19 vang hian Minister hlui pahnih an boral ta a ni.