Deputy Speaker in Tuikum bial-a Sialhau a tlawh

Tuikum bialtu MLA leh Assembly Deputy Speaker Er. Lalrinawma chuan nimin khan a bial chhunga Sialhau khua tlawhin Tui pump-na hmun leh hmun pawimawh dangte a tlawh.

Nimin-a Sialhau a tlawhna ah hian bialtu MLA chuan MNF in hun harsa tam tak a lo paltlang tawh thin thu sawiin, “Tun hunah pawh Covid avangin hun harsa kan tawk mek a. Hetiang hun harsa kan tawh laia Mizoram hruaitu tur ber party-in sawrkarna kan chang mek hi a lawmawm hle a ni. Tunah chuan hrilengin ziaawm lam a pan mek a, har-satna kan tawh lai pawha harsatna lian tham lutuk tawk lova sawrkarin min kaihruai thei hi ropui ka ti a, MNF Party te hi Pathian in hun harsaah min thlahthlam ngai lo niin ka hria,” a ti bawk.

Assembly Deputy Speaker chuan ei-zawnna, hriselna leh zirna a pawimawh thu pawh sawiin, “Heng thil pathumte hi bial enkawlna ah pawh ngaih pawimawh zual a ni a. Bial chhunga PHC leh Sub-Centre engemaw zat te Health & Wellness Centre-ah hlan kai ni ta te, Bial chhung Sub-Centre awm lohna khuaa Clinic Centre hawn a nih theih nana hmalak a ni chho ta te, Zirtirtu engemaw zat kan nei chho ta te leh sawrkar sikul a mi in rinna an nghat ta te, sikul building eng- emaw zat sak leh thawm that a nih avang te leh Link road engemaw zat laih a ni te hi sawrkar chungah lawmthu ka sawi,” a ti bawk.

Tuikum bialtu MLA hian Sialhau VC Treasurer ni lai F. Pazawna (ZPM) leh Congress atangin mi thar 22 te chu MNF-ah a lawmlut tih MNF chuan thuchhuah siamin an tarlang bawk.