Kawlphetha man ba-a harsatna chinfel a ni

Tunhnaia Mizoram sawrkarin Bill a pek theihloh avanga NEEPCO in Mizoram-a kawlphetha Supply tihtawp a tum chu chinfel a ni.

Power & Electricity hotute sawi danin, NEEPCO in Vawiin atanga kawlphetha pekchhuah an tihtawp tur an puan hnuah nimin khan sawrkar chuan kawlphetha man cheng vbc. 16.40 chu Bank kaltlangin NEEPCO hi pek an ni. P&E Department hotute chuan NEEPCO nena inremna an siam angin sum dah lawk Letter of Credit-ah hian sum hnawhkhah reng a ngai a. Bill chu pek tho a ni na a, Letter of Credit hnawhkhah a nih loh avang zawkin NEEPCO hian kawlphetha pek lohah an vau a, tum dangah pawh a thleng fo a, chinfel lehzel a nih thin thu an sawi a ni.

Zawhna chhangin P&E hotute chuan sawrkarin kawlphetha a leina (power purchase) aiin bill pek atanga sum an hmuh chu a tlem zawk a, mipui bill hian Mizoram mamawh a phuhru zo lo a, heitihlai hian mipuiin bill an pek chu sawrkar sum bawm pui-ah a lut tawp a, a pekchhuah chu sawrkar thu thu a ni, an ti. Mizoram chuan kawlphetha hi hmun 5 - NEEPCO, NTPC, NHPC, OTPC leh TSECL atangin a lei a ni.